"გულწრფელად უნდა ვთქვა, სოჭის ოლიმპიადა არასოდეს მეხატებოდა გულზე, მაგრამ 2008 წლამდე ღიად პოზიციას ვერ დავაფიქსირებდით,"- ამის შესახებ საქართველოს პრეზიდენტმა მიხეილ სააკაშვილმა სოჭის ოლიმპიადაში ქართველი სპორტსმენების მონაწილეობის საკითხის კომენტირებისას ისაუბრა.
"ჩვენ ყველანაირად ვცდილობდით გართულება თავიდან აგვეცილებინა, მაგრამ 2008 წლის შემდეგ სიტუაცია დრამატულად არის შეცვლილი, თან ამას მუდმივად გვახსენებს რუსეთი. ხალხს წაართვეს მთელი მიწები და საძოვრები რაც ჰქონდათ, დატოვეს ცარიელ-ტარიელი მშივრები. ეს დღეს ხდება, ამ კვირებში ხდება და ამ დღეებში ხდება,"- განაცხადა მიხეილ სააკაშვილმა.
ქვეყნის პირველი პირის თქმით, ივან ნეჩაევი არ არის შემთხვევით შერჩეული მეჩირაღდნე და ეს არის პოლიტიკური დემარში.
"ნეჩაევს ჩვენ ჩამოვუგდეთ თვითმფრინავი და ძლივს დასვა მათ ტერიტორიაზე. ეს იყო კაცი, რომელიც ძალიან აქტიურად გვბომბავდა. ჩვენს სამხედროებს კარგად ახსოვთ ვინ არის და სწორედ ამაში მისცეს "გმირობა", რომ ბევრი ხალხი დახოცა და დაგვბომბა. ეს კაცი არის ერთ-ერთი სიმბოლო ამ ოლიმპიადის,"- აღნიშნა სააკაშვილმა
