პარლამენტის თავმჯდომარემ, დავით უსუფაშვილმა ამერიკის შეერთებულ შტატებში რეგისტრირებული ორგანიზაციის „რუსეთში, უკრაინაში, ბალტიის ქვეყნებსა და ევრაზიაში ებრაელების მხარდამჭერი ეროვნული კონფერენცია (NCSJ) " ხელმძღვანელობა მიიღო.
ორგანიზაცია ყოფილ საბჭოთა კავშირის ტერიტორიაზე მცხოვრებ ებრაულ თემებს ეროვნული ტრადიციების, განათლების, კულტურისა და სათემო ცხოვრების შენარჩუნება-განვითარებაში ეხმარება. ორგანიზაციის წევრები პერიოდულად სტუმრობენ ყოფილ საბჭოთა კავშირის ქვეყნებს და ხელისუფლების წარმომადგენლებთან მართავენ შეხვედრებს.
შეხვედრაზე, რომელიც გაცნობით ხასიათს ატარებდა, ებრაულმა ორგანიზაციამ კმაყოფილება გამოთქვა ქართულ-ებრაული მრავალსაუკუნოვან თანაცხოვრებაზე და ქართველ ებრაელთა იმ ყოფაზე, რომლითაც ისინი საქართველოში ცხოვრობენ. სტუმრები საქართველოში მიმდინარე მოვლენებითაც დაინტერესდნენ და იკითხეს თუ რამდენად ახდენს გავლენას რუსეთის აგრესიული პოლიტიკა საქართველოს შიდა პოლიტიკურ ცხოვრებაზე.
მათ ასევე მადლობა გადაუხადეს ქართულ მხარეს ავღანეთის სამშვიდობო მისიაში მონაწილეობისთვის და ყველა იმ ღონისძიებისთვის, რომელიც მსოფლიოში მშვიდობის გამყარებას ეფუძნება.
პარლამენტის თავმჯდომარემ დელეგაციის წევრებს ქვეყნაში განხორციელებული მნიშვნელოვანი რეფორმები და საქართველოს საგარეო პრიორიტეტები გააცნო. საქართველოში სტუმრობის შემდეგ ებრაული ორგანიზაცია ვიზიტს აზერბაიჯანის რესპუბლიკაში განაგრძობს
