საქართველოს პრეზიდენტი მიხეილ სააკაშვილი სასჯელაღსრულების მინისტრს სოზარ სუბარს, ქვეყნის მთავარ პროკურორს არჩილ კბილაშვილს და სახალხო დამცველს უჩა ნანუაშვილს ოფიციალური წერილით მიმართავს.
მიხეილ სააკაშვილი სასჯელაღსრულების სისტემაში შექმნილ ვითარებას საგანგაშოს უწოდებს და მთავრობის წარმომადგენლებს დაუყოვნებელი რეაგირებისკენ მოუწოდებს.
ქვეყნის პირველი პირი აღნიშნავს, რომ იგი შეძრწუნებულია ქუთაისის ციხეში მომხდარი ტრაგედიით, კერძოდ, 16 წლის გოგა ძველაიას გარდაცვალების გამო და ამ ფაქტთან დაკავშირებით, კატეგორიულად მოითხოვს სრულყოფილ, გამჭვირვალე და ობიექტურ გამოძიებას.
შეგახსენებთ, რომ ქუთაისის მეორე საპყრობილეში არასრულწლოვანი პატიმარი 3 დღის წინ გარდაიცვალა. ქურდობის ბრალდებით დაკავებული 16 წლის სენაკელი საპატიმროში 5 დღის წინ შეიყვანეს. ახალგაზრდა სასჯელს უკვე მეორედ იხდიდა. პრეზიდენტმა ის მარიამობის დღესასწაულზე შეიწყალა.
