ავსტრიაში ოფიციალური ვიზიტით მყოფი საქართველოს საგარეო საქმეთა მინისტრი მაია ფანჯიკიძე ეუთო-ს გენერალურ მდივანს ლამბერტო ზანიერის შეხვდა.
შეხვედრაზე განიხილეს ოკუპირებულ რეგიონებში არსებული ვითარება, განსაკუთრებით კი საოკუპაციო ხაზზე ბოლო დროს განვითარებული მოვლნები. ისაუბრეს საქართველოში ეუთო-ს მისიის აღდგენის შესაძლებლობებზე, ჟენევის მოლაპარაკების მიმდინარეობაზე. ასევე 2013 წლის საპრეზიდენტო არჩევნებზე.
როგორც შეხვედრის დასრულების შემდეგ ეუთო-ს გენერალურმა მდივანმა აღნიშნა, ორგანიზაცია ცდილობს იპოვოს მიმდინარე პროცესებში ჩართვის გზები და უზრუნველყოს დახმარება.
„ეუთო-ს მუდმივმოქმედ საბჭოში საკმაოდ საინტერესო დისკუსია გვქონდა, სადაც გამოითქვა შეშფოთება საქართველოში განვითარებულ მოვლენებთან დაკავშირებით. ღობეების აღმართვა და მოსახლეობის დაყოფა უსიამოვნო ფაქტია. ეუთო არის ორგანიზაცია რომელიც ადამიანებს შორის არხების გახსნასა და კონტაქტების დამყარებაზეა კონცენტრირებული, და არა ღობეების აღმართვაზე. ჩვენ ვცდილობთ ვიპოვოთ მიმდინარე პროცესში ჩართვის გზები და ვუზრუნველყოთ დახმარება. ჩემთვის, როგორც ეუთოს გენერალური მდივნისთვის, პრიორიტეტულია საქართველოში ეუთოს ყოფნის გარკვეული ხარისხით აღდგენა. თუმცა, ჩვენ ჯერ კიდევ წარმოდგენილნი ვართ საქართველოში, კერძოდ, ინციდენტების პრევენციისა და რეაგირების მექანიზმში მონაწილეობის, ასევე პროექტების განხორციელების გზით. ჩვენ ვცდილობთ ჩავერიოთ და დავეხმაროთ მოსახლეობას კონტაქტების დამყარებაში. ეს ჩვენი გრძელვადიანი მიზანია. რა თქმა უნდა, ამგვარი ჩართულობის გაგრძელების თვალსაზრისით, ძალზედ მნიშვნელოვანია სრულად მონაწილეობა ჟენევაში მიმდინარე პოლიტიკურ პროცესებში. ეს მართლაც რომ უმნიშვნელოვანესი საკითხია"- განაცხადა ლამბერტო ზანიერიმ.