რუსეთის ფედერაციაში მცხოვრები საქართველოს მოქალაქეები 2013 წლის 27 ოქტომბერს საპრეზიდენტო არჩევნებში მონაწილეობის მიღებას ვერ შეძლებენ.
როგორც ცენტრალური საარჩევნო კომისიის საერთაშორისო ურთიერთობების განყოფილების უფროსმა ეკა აზარაშვილმა "ჯი-ეიჩ-ენთან" საუბრისას აღნიშნა, ცესკო საზღვარგარეთ საარჩევნო უბნების გახსნას საგარეო საქმეთა სამინისტროს მიერ მიწოდებული ქვეყნების ჩამონათვალის საფუძველზე ახორციელებს და ამ ჩამონათვალში რუსეთის ფედერაცია საქართველოსთან დიპლომატიური ურთიერთობის არ არსებობის გამო არ აღმოჩნდა.
"რუსეთში მცხოვრები ჩვენი თანამოქალაქეები სამწუხაროდ ვერ შეძლებენ არჩევნებში მონაწილეობის მიღებას იქიდან გამომდინარე, რომ ჩვენ საზღვარგარეთ საარჩევნო უბნებს ვხსნით საგარეო საქმეთა სამინისტროს მიერ მოწოდებული ინფორმაციის საფუძველზე და მათ მიერ გადმოცემულ იმ ქვეყნების ჩამონათვალში, სადაც საქართველოს აქვს დიპლომატიური წარმომადგენლობები, ამ ჩამონათვალში რუსეთი ვერ მოხვდა. შესაბამისად, ჩვენ ვერ გავხსნით რუსეთში საარჩევნო უბნებს,"- განუცხადა "ჯი-ეიჩ-ენს" ეკა აზარაშვილმა.
რაც შეეხება რუსეთის ფედერაციაში მცხოვრები სრულწლოვანი საქართველოს მოქალაქეების ზუსტ რაოდენობას, აზარაშვილის თქმით, ცესკო-ში ამის შესახებაც არ არსებობს მონაცემები, რადგან საარჩევნო ადმინისტრაცია საკონსულო აღრიცხვაზე რეგისტრირებული საქართველოს მოქალაქეების რაოდენობაზე ინფორმაციას საგარეო საქმეთა სამინისტროსგან მოწოდებული მონაცემებით იგებს.
"ვერ გეტყვით რუსეთში მცხოვრები ამომრჩევლების ზუსტ რაოდნობას იმიტომ, რომ საკონსულო აღრიცხვაზე რეგისტრირებულ ჩვენი თანამოქალაქეების რაოდენობაზე ინფორმაციას საგარეო საქმეთა სამინისტროსგან მოწოდებული მონაცემებით ვგებთ. ასე რომ, ჩვენ არ გვაქვს ინფომრაცია დღეს რუსეთში საკონსულო აღრიცხვაზე ჩვენი რამდენი თანამოქალაქე იმყოფება. 2012 წლის საპარლამენტო არჩევნებზეც ზუსტად იგივე მდგომარეობა გვქონდა. მაშინაც საგარეოს ჩვენთვის არ მოუწოდებია ჩამონათვალში რუსეთის ფედერაცია და შესაბამისად, 2012 წლის საპარლამენტო არჩევნებზეც რუსეთში არ გახსნილა საარჩევნო უბანი და იქ მცხოვრებ ჩვენს მოქალაქეებს სამწუხაროდ, ხმის მიცემის შესაძლებლობა არ ჰქონდათ,"- აღნიშნა აზარაშვილმა.