ექსპერტი უსაფრთხოების საკითხებში ხათუნა ლაგაზიძე გაზეთ "პრემიერთან" საუბარში ქართველების სოჭის ოლიმპიადაში მონაწილეობის საკითხზე საუბრობს და აცხადებს, რომ საქართველოს სოჭის ოლიმპიადაში მონაწილეობა საერთაშორისო თანამეგობრობამ პირდაპირ, ან ირიბად შეიძლება აღიქვას თანხმობად იმ პროცესებისა, რა პროცესებსაც რუსეთი საქართველოში ახორციელებს.
"ეს იქნება ამ ხელისუფლების ტრაგიკული შეცდომა. ამ ეტაპზე ვერანაირ მექანიზმს ვერ ვხედავ რუსეთთან ურთიერთობის გასაუმჯობესებლად. თუ რუსეთთან ურთიერთობის დარეგულირებას ვეძახით იმას, რომ სურვილისამებრ რუსული ბაზარი ხან გაგვიხსნან, ხან კი დაგვიხურონ... მოკლედ, ონიშჩენკო რუსულ ციცინათელად იქცა, ერთ დღეს წითელს ანთებს, მეორე დღეს _ მწვანეს. ერთადერთი, რასაც საქართველოს ნებისმიერი ხელისუფლება რუსეთთან ურთიერთობაში უნდა ცდილობდეს, ესაა, რომ თავიდან აიცილონ პროვოკაცია და მორიგი ანექსია. გამორიცხულია, რუსეთმა საქართველოს ანექსია შეაჩეროს, თუ სოჭში რომელიმე ქართველი ოლიმპელი ციგურებით ისრიალებს, ან მთიდან დაეშვება. ამიტომ ილუზია იმისა, რომ ჩვენ რაც არ უნდა დავთმოთ, რუსეთი აფხაზეთსა და სამხრეთ ოსეთს დაგვიბრუნებს, გამორიცხულია, რადგან ეს არის მისი ერთადერთი ბერკეტი საქართველოზე ზემოქმედებისთვის", - განაცხადა გაზეთ "პრემიერთან" საუბარში ლაგაზიძემ.