საქართველოში ოფიციალურ ვიზიტად მყოფ სურინამის რესპუბლიკის ეროვნული კრების თავმჯდომარეს ჯენიფერ სიმონს პარლამენტის თავმჯდომარე, დავით უსუფაშვილი და ქართველ პარლამენტართა ჯგუფი შეხვდა.
შეხვედრაზე მხარეებმა ორ ქვეყანას შორის თანამშრომლობის ასპექტები და პარლამენტთაშორისი ურთიერთობების დამყარების საკითხები განიხილეს.
სურინამის მხარემ დიდი ინტერესი გამოთქვა საქართველოში განვითარებულ რეფორმებთან დაკავშირებით, კერძოდ კი, მათი ინტერესის სფეროს განათლების სისტემის, ბიზნესის განვითარების და სოფლის მეურნეობის მიმართულებებით საქართველოს გამოცდილება წარმოადგენდა. დავით უსუფაშვილმა სურინამელ კოლეგას ქმედითი დახმარება აღუთქვა და მათთვის საინტერესო თემების უკეთ გასაცნობად ქართველ ექსპერტებთან შეხვედრას დაპირდა.
ორმხრივი შეხვედრის დასრულების შემდეგ საქართველოს და სურინამის პარლამენტების თავმჯდომარეებმა ჟურნალისტებისთვის ბრიფინგი გამართეს.
დავით უსუფაშვილი პარლამენტის სახელით კიდევ ერთხელ მიესალმა სურინამის საპარლამენტო დელეგაციას და აღნიშნა, რომ მათი სტუმრობა პირველი გაცვლითი ვიზიტია, რომელიც ორ ქვეყანას შორის კულტურულ, ეკონომიკურ და პოლიტიკურ ურთიერთობების დამყარების და გაძლიერების წინაპირობაა.
„სურინამი მდებარეობს მსოფლიოს იმ ნაწილში, სადაც პოლიტიკური ცხოვრება საკმაოდ დინამიურია. ჩვენი ინტერესი სამხრეთ ამერიკის და კარიბის ზღვის აუზის ქვეყნებისადმი მრავალმხრივია, მათ შორის იმისათვის, რომ ჩვენ ყველამ ერთად პატივი ვცეთ საერთაშორისო წესრიგს, საერთაშორისო დონეზე აღიარებულ სტანდარტებს ქვეყნის დამოუკიდებლობის და სუვერენიტეტის უზრუნველსაყოფად და აგრეთვე გამოვნახოთ ახალი საშუალებები ჩვენი ქვეყნის მოქალაქეებისთვის, რათა მათ ქონდეთ შესაძლებლობა მსოფლიოს ნებისმიერ წერტილში თავისუფლად იმოგზაურონ ტურისტულ თუ ბიზნეს ვიზიტებით", - განაცხადა დავით უსუფაშვილმა.
პარლამენტის თავმჯდომარის ინფორმაციით, სურინამის საპარლამენტო დელეგაციასთან ქართულმა მხარემ ის საკითხები განიხილა, რომლებიც ორივე ქვეყნის ინტერესებშია და შეთანხმდნენ, რომ ორი ქვეყნის პარლამენტებს შორის ურთიერთობა მჭიდრო თანამშრომლობით გაგრძელდება.
ჯენიფერ სიმონსმა მადლიერება და კმაყოფილება გამოთქვა საქართველოში გულთბილი მიღებისთვის. მისი განცხადებით, საპარლამენტო დელეგაცია გულისყურით გაეცნობა საქართველოში ბოლო დროს განხორციელებულ რეფორმებს და საკუთარ ქვეყანაში დაბრუნების შემდეგ რიგ ინსტიტუციონალურ საკითხებთან დაკავშირებულ ქართულ გამოცდილებას გაიზიარებენ.
სურინამის საპარლამენტო დელეგაცია ვიზიტის ფარგლებში შეხვედრებს გამართავს აღმასრულებელი ხელისუფლების წარმომადგენლებთან. ისინი ასევე გაეცნობიან იუსტიციის სახლის საქმიანობას და წეროვანში ჩასახლებულ იძულებით გადაადგილებულ პირების და სოფელ დვანის ადმინისტრაციული სასაზღვრო ზოლის მონახულებასაც გეგმავენ.