„საქართველოს მოქალაქეების ქვეყნიდან გასვლის და შემოსვლის წესების შესახებ" კანონში ცვლილებების პროექტი ინიციატორებმა უკან გაიტანეს.
კანონში ცვლილებების შეტანის ინიციატორები ირინა იმერლიშვილი და ზურაბ აბაშიძე იყვნენ. „კანონპროექტის გაუმჯობესებისა და შემდგომი სრულყოფის მიზნით, მიზანშეწონილად მიგვაჩნია წარმოდგენილი კანონპროექტი გამოვიხმოთ. მიგვაჩნია, რომ უმჯობესია მოცემული საკითხის სამართლებრივი რეგულირების მექანიზმები შეიმუშაოს და პარლამენტს წარუდგინოს შესაბამისი კომპეტენციით აღჭურვილმა სტრუქტურებმა, რომელბიც ახორციელებენ ქვეყანაში სახელმწიფო და საზოგადოებრივი უსაფრთხოების დაცვას," - ნათქვამია ირინა იმერლიშვილისა და ზურაბ აბაშიძის მიერ პარლამენტის აპარატის მიმართ გაკეთებულ მიმართვაში.
ირინა იმერლიშვილის თქმით, თუ შინაგან საქმეთა სამინისტრო უკეთ გაწერს შესაბამის რეგულაციებს, პარლამენტში კანონპროექტს ის შეიტანს.
შეგახსენებთ, რომ აღნიშნული კანონპროექტის მიხედვით, საქართველოს მოქალაქეს უარი შეიძლება ეთქვას საქართველოს მოქალაქის პასპორტის გაცემაზე, პასპორტის მოქმედების ვადის გაგრძელებაზე ან საზღვრის გადაკვეთაზე ორ შემთხვევაში: თუკი ის იძებნება სამართალდამცავი ორგანოების მიერ; თუ ის წარმოადგენს ყალბ ან ძალადაკარგულ საბუთს. ცვლილების განხორციელების შემტხვევაში აღნიშნულ ორ პუნქტს ემატებოდა მესამეც, რომლის მიხედვითაც, საქართველოს მოქალაქეს ქვეყნის დატოვების ნება შესაძლოა არ მიეცეს სახელმწიფო ან/და საზოგადოებრივი უსაფრთხოების დაცვის ინტერესებიდან გამომდინარე.