საგარეო და უსაფრთხოების პოლიტიკის საკითხებში ევროკავშირის უმაღლესი წარმომადგენელი კეტრინ ეშტონი მოუწოდებს რუსეთის ფედერაციას უზრუნველყოს ადმინისტრაციული გამყოფი ხაზის გასწვრივ აგებული ბარიერების მოხსნა და ადასტურებს ევროკავშირის მიერ საერთაშორისოდ აღიარებულ საზღვრებში საქართველოს ტერიტორიული მთლიანობის მხარდაჭერას. განცხადება ამის შესახებ საგარეო და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ევროკომისიის ვიცე-პრეზიდენტის კეტრინ ეშტონის პრესსპიკერმა გაავრცელა.
„ევროკავშირის უმაღლესი წარმომადგენელი დიდ შეშფოთებას გამოთქვამს რუსეთის უშიშროების ძალების მიერ საქართველოში, ცენტრალური ხელისუფლების მიერ კონტროლირებად ტერიტორიასა და აფხაზეთისა და სამხრეთ ოსეთის რეგიონების შორის არსებული ადმინისტრაციული გამყოფი ხაზის გასწვრივ ღობეებისა და სხვა დაბრკოლებების აღმართვის მიზნით საქმიანობის გაგრძელებასა და გააქტიურებაზე",_ ნათქვამია განცხადებაში და იქვე აღნიშნულია, რომ „ეს საქმიანობა არღვევს საქართველოს ტერიტორიულ მთლიანობას, უქმნის მნიშვნელოვან სირთულეებს მოსახლეობას ადმინისტრაციული გამყოფი ხაზის ორივე მხარეს და წარმოშობს სერიოზულ გამოწვევას სტაბილურობისა და უსაფრთხოებისთვის ამ რეგიონებში".
„ევროკავშირის უმაღლესი წარმომადგენელი მოუწოდებს რუსეთის ფედერაციას უზრუნველყოს ამ ბარიერების მოხსნა. ის კვლავ ადასტურებს ევროკავშირის მიერ საერთაშორისოდ აღიარებულ საზღვრებში საქართველოს ტერიტორიული მთლიანობის მხარდაჭერას", _ ნათქვამია განცხადებაში.
აღსანიშნავია, რომ 2013 წლის 30 სექტემბერს საქართველოში სტუმრობისას ევროკავშირის პოლიტიკისა და უსაფრთხოების კომიტეტის წარმომადგენლები ადმინისტრაციულ გამყოფ ხაზსა და ევროკავშირის სადამკვირვებლო მისიას ეწვივნენ.
მასალის გამოყენების პირობები