26 სექტემბერს, კოოპერატიულ ბინათმშენებლობასთან დაკავშირებით სახელმწიფო კომისიის მიერ შექმნილმა სამუშაო ჯგუფმა შეხვედრა გამართა კოოპერატივების წევრთა უფლებების დამცველი ორგანიზაციების წარმომადგენლებთან.
შეხვედრა, რომელსაც 10-მდე ორგანიზაციის წარმომადგენელი დაესწრო და რომელიც სამი საათის განმავლობაში მიმდინარეობდა, დასაწყისში ფინანსთა მინისტრის მოადგილეს, გიორგი ჯავახიშვილს მიჰყავდა.
მოგვიანებით, შეხვედრას შეუერთდა სახელმწიფო საშინაო ვალის პრობლემათა შემსწავლელი სახელმწიფო კომისიის თავმჯდომარე, ფინანსთა მინისტრი ნოდარ ხადური.
შეხვედრაზე კოოპერატივების წევრთა უფლებების დამცველი ორგანიზაციების წარმომადგენლებმა გამოთქვეს საკუთარი მოსაზრებები და წინადადებები ვალის ანაზღაურების მექანიზმებთან და ზოგადად, პრობლემის მოგვარების გზებთან დაკავშირებით.
როგორც შეხვედრაზე გადაწყდა, რომ კოოპერატივების წევრთა უფლებების დამცველი ორგანიზაციების წარმომადგენლები ინტენსიურად ჩაერთვებიან სამუშაო ჯგუფის მუშაობაში, რათა ერთობლივად მიღწეულ იქნას კოოპერატიულ ბინათმშენებლობასთან დაკავშირებული საკითხების სამართლიანად გადაწყვეტა.
