19 სექტემბერს, საქართველოს ფინანსთა მინისტრი ნოდარ ხადური ამერიკული კომპანია „Xerox"-ის ევრაზიის ოფისის წარმომადგენლებს - გენერალურ მენეჯერს ვლადიმირ ლავროვს და ოპერაციების დირექტორს სერგეი ტკაჩევს შეხვდა.
ორდღიანი ვიზიტის მიზანია, კომპანიის საქმიანობის არეალის გაფართოვება ახალი სერვისების დანერგვის მეშვეობით, როგორც საქართველოში, ისე ზოგადად, ამიერკავკასიის რეგიონში, აგრეთვე საქართველოს საინვესტიციო შესაძლებლობებისა და ბიზნეს-გარემოს გაცნობა.
ფინანსთა მინისტრმა, ნოდარ ხადურმა სტუმრებს გააცნო საქართველოს მთავრობის ძირითადი პრიორიტეტული მიმართულებები, ქვეყანაში მოქმედი საგადასახადო და საბაჟო კანონმდებლობა, საავტორო უფლებების დაცვის მარეგულირებელი კანონმდებლობა, ასევე ფინანსთა სამინისტროში მიმდინარე რეფორმები.
ფინანსთა მინისტრმა იმედი გამოთქვა, რომ შეხვედრა კომპანიის წარმომადგენლებს დაეხმარებათ, მეტი ინფორმაცია მიიღონ საქართველოში არსებული ბიზნეს-გარემოს შესახებ, რის შედეგადაც კომპანია ქართველ პარტნიორებთან ერთად ახალ საინვესტიციო პროექტებს განახორციელებს.
