ავიაკომპანია Fly Georgia-ს საერთაშორისო სალიზინგო კომპანია „აილეფსმა" მეორე Airbus-ის ტიპის თვითმფრინავიც ჩამოართვა. გავრცელებული ინფორმაციით, მეორე თვითმფრინავის ჩამორთმევაც სალიზინგიო კომპანიამ მას შემდეგ გადაწყვიტა, რაც Fly Georgia-მ აღებული ვალდებულება არ შეასრულა და „აილეფსს" კუთვნილი თანხა არ გადაუხადა. ეს იმ ფონზე, როდესაც Fly Georgia-ს სალიზინგო კომპანიამ სექტემბრის დასაწყისში ერთ-ერთი ხომალდი ბრიუსელში „დაუპატიმრა".
თავად Fly Georgia-ში მეორე თვითმფრინავის სავარაუდო ჩამორთმევაზე კომენტარს არ აკეთებენ, თუმც განმარტავენ, რომ კომპანიას ხელოვნურ ბარიერებს და პრობლემებს უქმნიან, თუმც კონკრეტული ადრესატის, თუ ადრესატების დასახელებისგან თავს იკავებენ.
როგორც Fly Georgia-ს წარმომადგენელმა ხათუნა მიქაცაძემ სააგენტო „ჯი-ეიჩ-ენს" განუმარტა, კომპანის პრობლემები მას შემდეგ დაეწყო, რაც Fly Georgia მოგებაზე გავიდა.
„Fly Georgia-ს გარეშემო პრობლემები ხელოვნურად იქმნება. თუ ვინ დგას ამ პრობლემების უკან ჯერჯერობით ჩვენთვის უცნობია. თუმცა რაღაც ვერსიები და ვარაუდები არსებობს. როგორც კი ამ პრობლემების წარმოშობის წყაროს დავადასტურებთ და გვეცოდინება ზუსტი ინფორმაცია, საზოგადოებას ამის შესახებ აუცილებლად ვაუწყებთ.
ამ ეტაპზე ვარაუდის დონეზე, რომ რაღაც ინფორმაციები გავავრცელოთ არც ჩვენს თავის მივცემთ ამის უფლებას და არც საზოგადოებას ვაკადრებთ შეცდომაში შეყვანას. კომპანიის გარეშემო პრობლემები იქმნება მას შემდეგ, რაც Fly Georgia მოგებაზე გავიდა და რეალურად გახდა ღირსებული კონკურენტი ბაზარზე"- განაცხადა მიქაცაძემ.
აღსანიშნავია, რომ Fly Georgia ბოლო პერიოდში რამდენიმე სკანდალში გაეხვა. ივლისში, Fly Georgia-ს მგზავრებით სავსე თვითმფრინავი გერმანიაში, ქალაქ დუსელდორფში გააჩერეს. გავრცელებული ინფორმაციით, ავიაკომპანიას მაშინ დუსელდორფის აეროპორტის დავალიანება ჰქონდა, რის გამოც საწვავი არ მისცეს.
იმავდროულად, Fly Georgia-ს პრობლემები საქართველოს მთავრობასთანაც შეექმნა, როდესაც გავლენიანმა „უოლ სტრიტ ჯორნალმა" სამი ირანელი ბიზნესმენი, რომლებიც საქართველოში ავიაკომპანია Fly Georgia-ს , „ინვესტბანკს" და სხვა ბიზნესებს ფლობენ, ოფიციალურ თეირანთან მჭიდრო კავშირში დაადანაშაულა. The Wall Street Journal-მა გამოაქვეყნა სტატია, რომელშიც აღნიშნული იყო, რომ ეკონომიკური სანქციების მიუხედავად, საქართველოში სულ უფრო იზრდება ირანელების ინვესტიცია. სტატიაში აღნიშნული იყო ისიც, რომ კერძოდ, საქართველოში ირანული კაპიტალით შექმნილია 150 მცირე თუ საშუალო კომპანია, ისლამური რევოლუციის მცველთა კორპუსის მიერ საერთაშორისო სანქციებისგან თავის დაღწევის მიზნით.
აღნიშნული სტატიის საპასუხოდ თავის მართლება მოუწია საქართველოს იუსტიციის მინისტრს.მაშინ თეა წულუკიანმა განაცხადა, რომ საქართველოს მთავრობა ირანის მიმართ გაეროს სანქციების შესრულებას მკაცრად აკონტროლებს და ირანის დაახლოებით 150-მდე იურიდიულ თუ ფიზიკურ პირს საბანკო ანგარიშიც გაუყინეს.
