როგორც ცნობილი, საქართველო „აღმოსავლეთ პარტნიორობის" მრავალმხრივი თანამშრომლობის II პლატფორმის - „ეკონომიკური ინტეგრაცია და ევროკავშირის პოლიტიკასთან შესაბამისობის უზრუნველყოფა" ფარგლებში, ბიზნესის განვითარების საკითხებზე შექმნილი სამუშაო ჯგუფის (II ლაბორატორია) - „თვითდასაქმება და მეწარმეობა" - შეხვედრას მასპინძლობს.
შეხვედრა იმართება ევროკომისიის, „ევროპული განათლების ფონდის" (European Training Foundation - ETF) და საქართველოს ეკონომიკისა და მდგრადი განვითარების სამინისტროს ორგანიზებით და ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრის აპარატის მხარდაჭერით.
შეხვედრაში მონაწილეობას მიიღებენ „ევროპული განათლების ფონდის", ევროკავშირის წევრი და აღმოსავლეთ პარტნიორი ქვეყნების (აზერბაიჯანის, ბელარუსის, მოლდოვას, საქართველოს, სომხეთის და უკრაინის) წარმომადგენლები.
სამუშაო შეხვედრის მიზანია გამოცდილების გაზიარება თვითდასაქმებასთან და ბიზნესის განვითარებასთან დაკავშირებულ საკითხებში, თანამშრომლობის გაღრმავება ბიზნეს სექტორს, საგანმანათლებლო ინსტიტუტებსა და ბიზნესის საკონსულტაციო ორგანიზაციებს შორის, ევროკავშირის წევრ ქვეყნებში არსებული თანამედროვე მიდგომების და საუკეთესო პრაქტიკის გაზიარება და ასევე, რეგიონული თანამშრომლობის გაღრმავება.
„აღმოსავლეთ პარტნიორობა" წარმოადგენს ევროკავშირის პოლიტიკას, რომლის მიზანია „აღმოსავლეთ პარტნიორობის" ქვეყნების (აზერბაიჯანის, ბელარუსის, მოლდოვას, საქართველოს, სომხეთის და უკრაინის) პოლიტიკური ასოცირებისა და ეკონომიკური ინტეგრაციის ხელშეწყობა და მათი შემდგომი დაახლოება ევროკავშირთან. „აღმოსავლეთ პარტნიორობა" ქმნის დამატებით შესაძლებლობებს საქართველოს ევროკავშირში შემდგომი ინტეგრაციის და მხარეებს შორის პოლიტიკური დიალოგის გაღრმავების მიმართულებით.
ქართული მხარე კიდევ ერთხელ აღნიშნავს საქართველო-ევროკავშირს შორის ურთიერთობების გაღრმავების მნიშვნელობას და მიესალმება ამ ურთიერთობების შემდგომი განვითარების მიზნით, მსგავსი საერთაშორისო შეხვედრების საქართველოში ჩატარებას.