საქართველოს ფინანსთა სამინისტროს აკადემიაში ფინანსთა მინისტრმა, ნოდარ ხადურმა, თსუ იურიდიული ფაკულტეტის დეკანმა, ირაკლი ბურდულმა და შპაიერის ადმინისტრაციულ მეცნიერებათა უნივერსიტეტის (გერმანია) ექსპერტებმა ფინანსთა სამინისტროს იმ თანამშრომლებს, რომლებმაც თსუ-ს ადმინისტრაციულ მეცნიერებათა ინსტიტუტის გადამზადების კურსები გაიარეს, სერტიფიკატებს გადასცეს.
სასწავლო კურსები წაიკითხეს შპაიერის უნივერსიტეტის ექსპერტებმა: თსუ-ს საპატიო დოქტორმა, პროფესორმა ანდრეას კნორმა, პროფესორმა კირა ბარანოვამ და პროფესორმა ნილს ოთთერმა.
„სასწავლო პროგრამის მიმდინარეობისას, განიხილებოდა ისეთი თემები, როგორიცაა: ევრო-კრიზისი, ადგილობრივი თვითმმართველობის ფინანსური საფუძვლები, აქტუალური საგადასახადო რეფორმები საერთაშორისო ჭრილში. იმედი მაქვს, თსუ-ს ადმინისტრაციულ მეცნიერებათა ინსტიტუტის დახმარებით და შპაიერის ადმინისტრაციულ მეცნიერებათა უნივერსიტეტის ექსპერტების მონაწილეობით გამართულ სემინარზე მიღებულ გამოცდილებას ჩვენი თანამშრომლები წარმატებით გამოიყენებენ საკუთარ საქმიანობაში," - განაცხადა ფინანსთა მინისტრმა ნოდარ ხადურმა.
ფინანსთა სამინისტროს თანამშრომლებისთვის თსუ ადმინისტრაციულ მეცნიერებათა ინსტიტუტის გადამზადების პროგრამა „აქტუალური საკითხები საჯარო ფინანსებში" 8 სექტემბერს დაიწყო და მასში მონაწილეობა მიიღეს ფინანსთა სამინისტროს საბიუჯეტო დეპარტამენტის, ფისკალური პროგნოზირების დეპარტამენტის, ადმინისტრაციული დეპარტამენტის, დავების განხილვის სამსახურის, შემოსავლების სამსახურის და საგადასახადო პოლიტიკის დეპარტამენტის თანამშრომლებმა.
„ადმინისტრაციულ მეცნიერებათა ინსტიტუტი" თსუ-ში 2013 წლის 12 თებერვალს დაფუძნდა. მისი დაფუძნების ინიციატორები იყვნენ საქართველოს ფინანსთა სამინისტრო, ივანე ჯავახიშვილის სახელობის თბილისის სახელმწიფო უნივერსიტეტი და შპაიერის ადმინისტრაციულ მეცნიერებათა უნივერსიტეტი.
ინსტიტუტის ძირითადი მიზანია საქართველოს საჯარო მოხელეთა გადამზადება და კვალიფიკაციის ამაღლება. გადამზადების პროგრამა ფინანსთა სამინისტროს თანამშრომლებისთვის 10 სექტემბერს დასრულდა.
