საქართველოს შრომის, ჯანმრთელობის და სოციალურ საკითხთა დაცვის მინისტრის დავით სერგეენკოს განცხადებით, იაშვილის სახელობის კლინიკის ხელმძღვანელობის მხრიდან კონკრეტული გადაცდომების დაფიქსირების შემთხვევაში, შესაბამისმა პირებმა პასუხი უნდა აგონ.
როგორც სერგეენკომ დღეს იაშვილის კლინიის მედპერსონალის მიერ ჩატარებული საპროტესტო აქციის კომენტირებისას აღნიშნა, სამედიცინო დაწესებულების ყოფილმა მფლობელებმა მისი გასხვისება ჯანდაცვის სამინისტროს საქმის კურსში ჩაყენების გარეშე მოახდინეს.
"რამდენიმე დღის წინ აბსოლუტურად გაუგებრად იაშვილის კლინიკის ყოფილმა მფლობელებმა ისე, რომ არავის არაფერი კითხეს, გაყიდეს ეს დაწესებულება. ბოლო 5 დღეა, განუწყვეტელი სკანდალები ხდება ახალი მფლობელის მხრიდან. მასაც არ შეუწუხებია თავი, რომ საქმის კურსში ჩავეყენებინეთ ასეთ მნიშვნელოვან ინფრასტრუქტურაზე. ხაზი მინდა გავუსვა იმას, რომ არანაირი მნიშვნელობა არ აქვს ახალი მფლობელი თურქია თუ რომელიმე სხვა ეროვნების მფლობელი. კანონის წინაშე ყველას თანაბრად მოეთხოვება,"- განაცხადა დავით სერგეენკომ.
ცნობისთვის, იაშვილის სახელობის კლინიკის თანამშრომლები სამედიცინო დაწესებულების ახალი მმართველის მიერ საავადმყოფოს პალატებში ხატების ჩამოხსნის ბრძანების გაცემას აპროტესტებენ და კომპანიის ახალი ინვესტორის წარმომადგენელს სამსახურში მუდმივად არაფხიზელ მდგომარეობაში გამოცხადებასა და ექიმებისთვის სიტყვიერი და ფიზიკური შეურაცხყოფის მიყენებაში ადანაშაულებენ.
ამ დროისთვის იაშვილის სახელობის კლინიკასთან მიმდინარე მედპერსონალის საპროტესტ აქცა დასრულებულია. ექიმების განცხადებით, ისინი მომხდარ ფაქტთან დაკავშირებით ჯანდაცვის სამინისტროს ოპერატიულ რეაგირებას ელოდებიან, წინააღმდეგ შემთხვევაში კი, ხვალიდან გაიფიცებიან და სამედიცინო დაწესებულების მუშაობას შეაჩერებენ.
