საქართველოს საგარეო საქმეთა მინისტრის მაია ფანჯიკიძის განცხადებით, "სირიაში მყოფი საქართველოს მოქალაქეები უნდა ჩამოყალიბდნენ ერთ პოზიციაზე - უნდათ თუ არა საქართველოში დაბრუნება".
როგორც ფანჯიკიძემ დღეს სასტუმრო "რედისონში" მიმდინარე ამბასადორიალზე განაცხადა, "საქართველოს საგარეო საქმეთა სამინისტრომ მათთვის შეიძინა ავიაბილეთები, რომ ისინი პირველ სექტემბერს, ბეირუთის და ქაიროს გავლით, ჩამოსულიყვნენ საქართველოში. სამწუხაროდ, თავად მათ შორის არ არის ჩამოყალიბებული პოზიცია, უნდათ თუ არა სირიიდან გამოსვლა"
"შეშფოთებული ვარ სირიაში არსებული ვითარებით, სადაც ჰუმანიტარული კატასტროფა არნახულ მასშტაბებს იღებს. ჩვენ მივესალმებით და მხარს ვუჭერთ საერთასორისო თანამეგობრობის ,მზადყოფნას უფრო აქტიური როლი შეასრულოს სირიის ჰუმანიტარული კატასტროფის დაძლევაში და პასუხი მოსთხოვოს ამ უმძიმესი დანაშაულის ჩამდენთ. ჩვენ ასევე მხარს ვუჭერთ საერთაშორისო თანამეგობრობის, მათ შორის გაეროს გენერალური მდივნისა და არაბთა ლიგის სპეციალური წარმომადგენლის პოლიტიკას და აქტიურად ვმონაწილეობთ სირიელი ხალხის მეგობარი სახელმწიფოების სამუშაო ჯგუფის საქმიანობაში. სირიაში მყოფ ქართველებზე მინდა ვთქვა, რომ საქართველოს საგარეო საქმეთა სამინისტრომ მათთვის შეიძინა ავიაბილეთები, რომ ისინი პირველ სექტემბერს, ბეირუთის და ქაიროს გავლით, ჩამოსულიყვნენ საქართველოში. სამწუხაროდ, თავად მათ შორის არ არის ჩამოყალიბებული პოზიცია, უნდათ თუ არა სირიიდან გამოსვლა. ალბათ გარკვეულ წილად მიაჩნიათ, რომ მათი იქ ყოფნა გარკვეულწილად უსაფრთხოა. ჩვენი რჩევა და თხოვნა მათთვის გასაგებია და აწი ზრდასრულმა ადამიანებმა უნდა გადაწყვიტონ, რა უნდათ. ჩვენ საკონსულოს აქვთ მუდმივი კონტაქტი მოქალაქეებთან. შეიძლება ვიღაცამ რაღაც ვერ მოასწრო, მაგრამ მათთვის ამ დახმარებაზე უარი არავის უთქვამთ. სამინისტრომ ოპერატიულად და დროულად შესთავაზა დაბრუნება საქართველოში. ამიტომ სამინისტროს მიმართ საყვედურს კატეგორიულად არ დავუშვებთ. საჭიროა, შევთანხმდეთ ერთ პოზიციაზე, მათ უნდა უნდოდეთ დაბრუნება და ჩვენ ეს უნდა უზრუნვევლყოთ",- განაცხადა მაია ფანჯიკიძემ.
აღნიშნულ საკითხს ეგვიპტეში, სირიასა და ტუნისში საქართველოს საგანგებო და სრულუფლებიანი ელჩი არჩილ ძულიაშვილიც გამოეხმაურა და განაცხადა, რომ დიპლომატიური წარმომადგენლობა სხვადასხვა სახის სამუშაოებს აქტიურად აწარმოებს, რათა სირიის დედაქალაქში მყოფი საქართველოს მოქალაქეების უსაფრთხო ადგილზე გადაიყვანონ.
"ქართული მხარის მიერ ყველა საკითხი გაკეთდა ოპერატიულად, რათა ჩვენი მოქალაქეებისთვის სასწრაფო დახმარება გაგვეწია სირიის ტერიტორიის დასატოვებლად და საქართველოში ჩამოსასვლელად. ამ ეტაპზე შემიძლია გითხრათ, რომ ჩვენ სხვადასხვა ალტერნატიულ გზებზე ვმუშაობთ და ჩვენს მთავარ მიზანს წარმოადგენს საქართველოს მოქალაქეების გადავიდნენ უსაფრთხო ადგილას,"- განაცხადა არჩილ ძულიაშვილმა.
შეგახსენებთ, რომ საქართველოს18-მა მოქალაქემ საგარეო საქმეთა სამინისტროს მიერ შეძენილი ავიაბილეთებით სარგებლობა ვერ მოახერხა და ისინი ამ დრომდე დამაასკოში რჩებიან.
არსებული ინფორმაციით ამის მიზეზი სირია-ლიბანის საზღვარზე არსებული რიგებია.
დამასკოში მყოფი საქართველოს მოქალაქის ნარგიზა ლომთათიძის განცხადებით, სირიის დედაქალაქში დარჩენილ ქართველებს საქართველოს საგარეო საქმეთა სამინისტროდან ამ დრომდე არავინ დაკავშირებია და კონფლიქტის ეპიცენტრში მყოფი საქართველოს მოქალაქეები დამასკოს დასატოვებლად თურქეთ-სირიის საზღვრის ერთი საათით გახსნას ითხოვენ.
"დამასკოში სასტუმროში ვართ, არ გამოვსულვართ და ველოდებით პასუხს. გაგვაგებინონ რა ხდება, ან პირობა მოგვცენ რომ ყურადღებას მოგვაქცევენ, ან მტკიცე უარი გვითხრან. ვერ გავიგე რა ხდება. ერთი საათით გაგვიხსნან თურქეთის საზღვარი და ჩვენ თვითონ გავალთ, იქიდან თურქეთში შევალთ და გადავალთ თბილისში. სახელმწიფო თუ ზარალდება, არ გვინდა ეს მათი ხარჯები. საზღვარზე აქიდან კი გვატარებენ, მაგრამ თურქეთი არ გვიშვებს, რადგან სირიასთან საზღვარი დაკეტილი აქვს,"- განაცხადა ნარგიზა ლომთათიძემ.
ცნობისთვის, სირიის დედაქალაქ დამასკოში რამდენიმე დღეა არეულობაა. სამთავრობო ჯარების მიერ ქიმიური იარაღის გამოყენებას ათობით ადამიანი და არასრულწლოვანი ემსხვერპლა.
