ქალაქში შეჩერებული მშენებლობის დასრულებისა და სამშენებლო ბიზნესის ხელის შეწყობის მიზნით, 2013 წლის ივლისში თბილისის მერიის ინიციატივით, მიღებულ იქნა კანონი ექსპლუატაციაში მიღების დროებითი წესის შემოღებასთან დაკავშირებით, რომლის საფუძველზეც უკვე დასრულებული ან დასრულების ეტაპზე მყოფი მშენებლობების დამკვეთებს შესაძლებლობლობა მიეცათ, გამარტივებული პროცედურებით, ჯარიმის გადახდის გარეშე, მოახდინონ ობიექტების ექსპლუატაციაში მიღება. გამარტივებული წესით მოსარგებლე პირებს აღარ უწევთ ექსპლუატაციაში მიღების ვადებისა და სანებართვო პირობების დარღვევის გამო, საჯარიმო სანქციების გადახდა. ექსპლუატაციაში მიღების გამარტივებული წესი 2014 წლის 16 იანვრამდე მოქმედებს.
კანონის ცვლილების ძალაში შესვლის დღიდან დროებითი წესით უკვე ისარგებლა დედაქალაქის ტერიტორიაზე არსებული 469 შენობის მესაკუთრემ. მათგან 300-ზე მეტს უკვე გადაეცა შესაბამისი გადაწყვეტილება. მათ შორის არის დიდ დიღომში მდებარე ამხანაგობა ,,მირაჟი"-ს მიერ აშენებული მრავალბინიანი საცხოვრებელი სახლი, რომელის მესაკუთრემ განცხაედებით მომართა თბილისის მერიას, შესაბამისად შენობა მიღებულ იქნა ექსპლუატაციაში და მოსახლეობას შესაძლებლობა მიეცა საკუთარი ფართი საჯარო რეესტრში დაარეგისტრირონ. აღნიშნული ობიექტი დღეს გიგი უგულავამ დაათვალიერა და მოსახლეობას მერიის გადაწყვეტილება პირადად გააცნო.
