ბათუმში, რეფერალური კლინიკის ბაზაზე უნივერსიტეტის ერთი სამედიცინო ფაკულტეტი გახსნება. აღნიშნულ საკითხზე აჭარის მთავრობის თავმჯდომარემ თურქული უნივერსიტეტის დელეგაციასთან შეხვედრისას ისაუბრა. დელეგაციაში სტამბოლის ბახჩეშეჰირის უნივერსიტეტის მფლობელი, ენვერ იუჯელიც იმყოფება. არჩილ ხაბაძემ და ენვერ იუჯელიმ
ერთობლივი სამომავლო საგანმანათლებლო პროექტები განიხილეს, მათ შორის სტუდენტური გაცვლითი პროგრამების დაგეგმვისა და განხორციელების საკითხები. საუბარი შეეხო ასევე სამედიცინო სკოლისა და საუნივერსიტეტო კლინიკის დაფუძნებას, რათა განხორციელდეს საგანმანათლებლო საქმიანობის შემდგომი განვითარება ბახჩეშეჰირის უნივერსიტეტსა და აჭარის ავტონომიური რესპუბლიკას შორის.
„თანამშრომლობის იდეა დეკემბერში თურქეთში ჩვენი ვიზიტის დროს გაჩნდა. პროექტი ამ ეტაპზე ითვალისწინებს ბათუმში, რეფერალური კლინიკის ბაზაზე უნივერსიტეტის ერთი სამედიცინო ფაკულტეტის გახსნას, რომელშიც რამდენიმე მიმართულება გაერთიანდება. მომავალ წელს ფაკულტეტი გაივლის ავტორიზაციას და სექტემბრიდან სრულად ჩაერთვება საგანმანათლებლო სისტემაში. ახლო პერსპექტივაში რეფერალურ საავადმყოფოზე მიშენდება კიდევ ერთი ფლიგელი, სადაც უნივერსიტეტის ფაკულტეტი განთავსდება"- განაცხადა არჩილ ხაბაძემ შეხვედრის შემდეგ.
ბახჩიშეჰერის უნივერსიტეტს აქვს ფილიალები 10 სხვადასხვა ქვეყანაში, მათ შორის აზერბაიჯანშიც. დაწესებულება კურირებს საბავშვო ბაღებსა და სხვადასხვა ტიპის კლინიკებს. უნივერსიტეტის სტუდენტები ჩართული არიან მსოფლიოს სხვადასხვა სასწავლებლებთან გაცვლით პროგრამებში.
