საქართველოს ვიცე-პრემიერი, ეკონომიკისა და მდგრადი განვითარების მინისტრი გიორგი კვირიკაშვილი ერევანში, სომხეთის პრემიერ-მინისტრს ტიგრან სარქისიანს შეხვდა. მხარეებმა ორ ქვეყანას შორის ეკონომიკური ურთიერთობის საკითხები განიხილეს.
შეხვედრაზე საქართველოს ვიცე-პრემიერმა, ეკონომიკისა და მდგრადი განვითარების მინისტრმა განაცხადა, რომ საქართველოს ხელისუფლება სომხეთთან ორმხრივად ხელსაყრელი საინვესტიციო პროგრამების რეალიზაციით არის დაინტერესებული. გიორგი კვირიკაშვილის განცხადებით, მნიშვნელოვანია ორ ქვეყანას შორის ურთიერთანამშრომლობა ისეთ სფეროებში, როგორიცაა კომუნიკაციები, ვაჭრობა, ტურიზმი და სოფლის მეურნეობა.
საუბარი ასევე შეეხო სატრანსპორტო მიმოსვლის სფეროში თანამშრომლობის გაღრმავებას და ერევანსა და თბილისს შორის პირდაპირი ავიამიმოსვლის აღდგენას.
ვიზიტის ფარგლებში გიორგი კვირიკაშვილი სომხეთის ეკონომიკის მინისტრს, ვაგრამ ავანესიანსა და ტრანსპორტისა და კომუნიკაციების მინისტრს, გაგიკ ბეგლარიანს შეხვდა. მინისტრებმა საქართველოსა და სომხეთს შორის სამომავლო თანამშრომლობის საკითხებზე ისაუბრეს.
შეხვედრებზე ასევე გამახვილდა ყურადღება ქართულ-სომხური მთავრობათაშორისი კომისიის სხდომის ჩატარების აუცილებლობაზე. გადაწყდა, რომ მთავრობათაშორისი კომისიის სხდომა უახლოეს მომავალში ჩატარდება.
