Forbes-მა ამერიკელი მომღერალი მადონა ცნობილ ადამიანებს შორის ყველაზე მაღალანაზღაურებად ადამიანად დაასახელა. გამოცემის ინფორმაციით, მადონამ 2012 წლის ივლისიდან 2013 წლის ივლისის ჩათვლით 125 მლნ დოლარი გამოიმუშავა.
გასულ წელს კი ანალოგიურ რეიტინგში ცნობილი ტელეწამყვანი და პროდიუსერი ოპრა იუნფრი ლიდერობდა, რომელმაც ერთ წელიწადში 165 მლნ დოლარის გამომუშავება მოახერხა.
Forbes-ის ინფორმაციით, მადონას ყველაზე მეტი შემოსავალი ალბომ MDNA-ს მხარდამჭერმა ტურნემ მოუტანა. თუმცა უნდა აღინიშნოს ისიც, რომ მადონას სერიოზული შემოსავალი აქვს ასევე ტანსაცმლის საკუთარი ხაზიდან და ასევე საკუთარი პარფიუმიდან.
რეიტინგში მეორე პოზიციაზეა სტივენ სპილბერგი, რომელმაც ერთ წელიწადში 100 მლნ დოლარი გამოიმუშავა.
მესამე პოზიცის სამი ცნობილი ადამიანი იყოფს, რომლებმაც წელიწადში 95 მლნ დოლარის შემოსავალი მიიღეს. ესენი არიან: ტელეწამყვანი საიმონ კოელი, რომელსაც შოუები The X Factor და Got Talent მიყავს და ასევე მისი ამერიკელი კოლეგა ჰოვარდ სტერნი. მესამე პოზიციაზე იმყოფება ასევე ბრიტანელი მწერალი ე.ლ. ჯეიმიც.
შეგახსენებთ, რომ პოპის დედოფალი - მადონა ლუიზა ჩიკონე ბეი აშშ-ში, მიჩიგანის შტატში დაიბადა. ის მესამე ბავშვი იყო კრაისლერის ინჟინრის, იტალო-ამერიკელი სილვიო „ტონი" ჩიკონეს და კვებეკელი მადონა ლუიზა ფორტინის რვაშვილიან ოჯახში
მადონას დედა 1963 წლის 1 დეკემბერს, 30 წლის ასაკში მკერდის კიბოთი გარდაიცვალა. მოგვიანებით, მამამისმა ცოლად ოჯახის მოახლე - ჯოან გუსტაფსონი შეირთო და ერთად მათ კიდევ ორი შვილი შეეძინათ.
მადონამ მკაცრი მამის დაყოლიება მოახერხა და ბალეტის გაკვეთილებზე სიარულის ნებართვა მიიღო. მის ბალეტის მასწავლებელს - ქრისტოფერ ფლინს მადონა გეი-დისკოთეკებზე გამოყავდა. პარალელურად, იგი როჩესტერის ადამსის სახელობის სკოლაში სწავლობდა, სადაც იგი სანიმუშო ფრიადოსანი და მხარდამჭერი რაზმის წევრი იყო.
პირველივე კურსიდან მადონამ მიჩიგანის უნივერსიტეტი მიატოვა და 1978 წელს ნიუ იორკში მოცეკვავის კარიერის გასაგრძელებლად გაემგზავრა.
ნიუ იორკში მადონა დაბალანაზღაურებად სამუშაოებზე მუშაობდა. ფრანგი დისკო არტისტის, პატრიკ ჰერნანდესის 1979 წლის მსოფლიო ტურნეში მოცეკვავეს სტატუსით მონაწილეობისას, მადონამ გაიცნო მუსიკოსი დენ გილროი, რომელთან ერთადაც მოგვიანებით თავისი პირველი როკ ჯგუფი „ბრეკფასტ კლაბი" ჩამოაყალიბა. ამ ჯგუფში მადონა მღეროდა და გიტარასა და დასარტყამ ინსტრუმენტებზე უკრავდა. მოგვიანებით კი თავის ყოფილ ბოიფრენდთან, დრამერ სთივენ ბრეისთან ერთად, 1980 წელს ჯგუფი „ემმი" დააარსა. ბრეისთან ერთად, ის საცეკვაო მუსიკას ქმნიდა, რომლითაც ნიუ იორკის დისკოთეკები დაინტერესდნენ. დიჯეი და მუსიკალური პროდიუსერი მარკ კამინსი მოხიბლული დარჩა მისი დემო ჩანაწერებით და მადონა ხმისჩამწერი კომპიანია „საია რეკორდს"-ის დამფუძნებელს, სეიმურ სტაინს წარუდგინა. სწორედ ამის შემდეგ დაიწყო მადონას თავბრუდამხვევი კარიერა. მადონამ ჩაწერა უმარავი დისკი და მისი სიმღერები თითქმის ყველა გაჰიტდა, რამაც მადონას დიდი შემოსავალი მოუტანა.
