„ნაციონალური მოძრაობა" შსს-ს კრიმინალთან ბრძოლაში შევარდნაძის დროინდელი მეთოდების გამოყენებაში ადანაშაულებს. „ჯი-ეიჩ-ენი" პარტიის მიერ გავრცელებულ განცხადებას გთავაზობთ უცვლელად:
„ჩვენ ამ წუთებამდე თავს ვიკავებდით პოზიციის გამოხატვისგან და
ველოდით შინაგან საქმეთა სამინისტროსგან გუშინდელი მოვლენების
ახსნას.
გუშინ, დღის მეორე ნახევარში საპატრულო ეკიპაჟების წევრებმა და პოლიციის ოპერატიულმა მუშაკებმა მოულოდნელად, ყოველგვარი საფუძველის თუ ახსნა განმარტების გარეშე მთელი ქალაქის მასშტაბით დაიწყეს მოქალაქეთა მასობრივად გაჩერება და გულმოდგინე ჩხრეკა.
ამას უკვე ღამის საათებში მოყვა ასევე მთელი ქალაქის მასშტაბით ყველასათვის უკვე კარგად დავიწყებული მასობრივი რეიდები სტაციონარული პიკეტების მოწყობის ჩათვლით.
ეს ვითარება გაგრძელდა დილამდე, რამაც მოსახლეობაში სრულიად გასაგები დაძაბულობა გამოიწვია. სამწუხაროდ, შინაგან საქმეთა სამინისტროს მესვეურებმა არ ისურვეს შეშფოთებული მოქალაქეებისთვის სიტუაციის თუნდაც ელემენტარულ დონეზე განმარტება, რამაც შექმნილი დაძაბულობა კიდევ უფრო დაამძიმა და ათასნაირი მითქმა-მოთქმა გამოიწვია.
ერთიანი ნაციონალური მოძრაობამ არაერთხელ გამოხატა შეშფოთება ქვეყანაში კრიმინოგენური ვითარების გაუარესების გამო. დღე არ გავა რომ არ გავიგოთ მკვლელობის, ყაჩაღობის თუ სროლის შესახებ. სამწუხაროდ დღემდე მთავრობა ადექვატური რეაგირების ნაცვლად „გაუმჯობესებული სტატისტიკით" იწონებდა თავს.
გუშინდელი მოვლენები გვაფიქრებინებს, რომ მაღალ დონეზე მოხდა კრიმინოგენური ვითარების დამძიმების მაღალი ხარისხის რეალური აღქმა და მათ მიერვე გავრცელებული გაყალბებული სტატისტიკის უარყოფა. მაგრამ სამწუხაროა, რომ არსებულის გამოსწორების მიზნით სამართალდამცავი სტრუქტურების დღევანდელი ხელმძღვანელობა შევარდნაძის დროინდელი კადრების და მეთოდების რესტავრაციით ცდილობს ფონს გასვლას.
რეიდები, სტაციონარული პიკეტები კრიმინალთან ბრძოლის სრულიად არაეფექტური მეთოდია და გვაბრუნებს შევარდნაძისა და კახა თარგამაძის დროში, საბოლოოდ აზარალებს კეთილსინდისიერ მოქალაქეებს, უქმნის მათ თავისუფლად გადაადგილების პრობლემას, ატარებს მათი პიროვნული შეურაცხყოფის მაღალ საფრთხეს, ძირს
უთხრის მოქალაქეთა თვალში პოლიციელთა რეპუტაციას, წარმოშობს კორუფციას. ჩვენს მოქალაქეებს ამის დიდი და მძიმე გამოცდილება აქვთ.ცალკე საკითხია დაუსაბუთებელი ჩხრეკა. ჩვენ გვახსოვს, რომ სულ რამდენიმე თვის წინ შსს მინისტრის მოადგილემ, ბატონმა იზორიამ დიდი ზარ-ზეიმით ამცნო საზოგადოებას, რომ საკანონმდებლო დონეზე აიკრძალა ჩხრეკა დასაბუთებული ეჭვის დონეზეც კი. გუშინ ჩვენ სრულიად საწინააღმდეგო ვიხილეთ. ვიხილეთ ის, რაც სრულიად უკანონოა და დაუშვებელი.
არსებობს მსოფლიოში აპრობირებული კრიმინალთან ბრძოლის მეთოდები: ინფორმაციის მოპოვება, დამუშავება, ოპერატიული მოქმედებები. მოვუწოდებთ სამართალდამცავებს, სწორედ ამ მეთოდებით იმუშაონ და გათავისუფლდნენ
ალავიძის დროინდელი როგორც მეთოდებისგან, ასევე კადრებისგან, რომლებიც ამ მეთოდებს ნერგავენ. სანამ მინისტრის მოადგილე ყოფილი სოსო ალავიძის მოადგილე ალეკო ტაბატაძეა, სანამ ხელისუფლება, რომელიც მოვიდა ლოზუნგით, რომ „კაი ბიჭების დრო დაბრუნდა" თავად აქეზებს დამნაშავეებს პოლიტიკური ოპონენტების წინააღმდეგ, სანამ დამნაშავეები და კრიმინალური იდეოლოგიის აპოლოგეტები სახელისუფლო სტრუქტურებში ჭარბობენ, კრიმინალთან ბრძოლაში ამ უკანასკნელთა უპირატესობა გარდაუვალია"- ნათქვამია „ნაციონალური მოძრაობის განცხადებაში.
