კოალიცია "ქართული ოცნების" ახალგაზრდული ორგანიზაციის ხელმძღვანელის ოთარ აბესაძის განცხადებით, გავრცელებული ინფორმაცია იმის შესახებ, რომ მმართველი კოალიციის ასობით წევრმა გაწეული სამუშაოსთვის შესაბამისი ანაზღაურების გაუცემლობის გამო, პარტიის დატოვების გადაწყვეტილება მიიღო, სიმართლეს არ შეესაბამება.
როგორც აბესაძემ "ჯი-ეიჩ-ენთან" საუბრისას განაცხადა, "კოალიცია "ქართულ ოცნების" ახალგაზრდულ ფრთას არც 2012 წლის საპარლამენტო არჩევნების წინა პერიოდში და არც მომავალი საპრეზიდენტო არჩევნებისთვის ანაზღაურების თაობაზე არც ერთ ახალგაზრდასთან სახელშეკრულებო პირობები არ ჰქონია და ენთუზიასტი მხარდამჭერები არა ფულის, არამედ -იდეის გარშემო არიან გაერთიანებულები".
მისივე თქმით, მთელი ქვეყნის მასშტაბით "ქართული ოცნების" 73-ვე ახალგაზრდულ ორგანიზაციაში მხარდამჭერთა რაოდენობა როგორც მინიმუმ, გაორმაგებულია".
"სრული პასუხისმგებლობით ვაცხადებ, "ქართული ოცნების" ახალგაზრდული ფრთის შემადგენლობა როგორც მინიმუმ, გაორმაგებულია. დადასტურდა მხოლოდ ის ფაქტი, რომ "თავისუფალი დემოკრატების" მხარდამჭერმა რამდენიმე წევრმა შეიცვალა პოლიტიკური შეხედულებები და ორგანიზაციიდან წავიდა. მოგეხსენებათ, პარტია ცოცხალი ორგანიზმია, სადაც მიდიან და მოდიან. ჯერ ჯერობით ვერ დავადასტურებ ინფორმაციას, რომ ახალგაზრდულიდან ხალხი მიდის. რაც შეეხება უშუალოდ მხარდამჭერებს, ისინი მოძრავი ძალაა და შეიძლება ადვილად შეიცვალონ პოლიტიკური შეხედულებები,"- განაცხადა ოთარ აბესაძემ.
ცნობისთვის, "ახალგაზრდა უფლებადამცველთა ასოციაციის" წარმომადგენლების ალექსანდრე კობაიძის, იაგო წიტაიშვილის და ნიკა მემანიშვილის განცხადებით, კოალიცია "ქართულ ოცნებას" ახალგაზრდები მასიურად, მთელი ქვეყნის მასშტაბით ტოვებენ. მათი თქმით მხოლოდ თბილისის მასშტაბით, კოალიციის რიგები 3300 ახალგაზრდამ დატოვა.
"კოალიცია "ქართული ოცნების" წარმომადგენელთა დამოკიდებულება მათი ახალგაზრდული ფრთის მიმართ თავიდანვე არასწორი იყო. თავიდანვე ეს ახალგაზრდები აცხადებდნენ, რომ თანხები, რომლებიც მათთვის იყო გამოყოფილი, არასწორად გადანაწილდა. "ქართული ოცნების" წარმომადგენლებმა თავიანთ თავს უნდა დააბრალონ ეს ყველაფერი. მხოლოდ ბოლო შემთხვევაზე მოგახსენებთ, რამდენიმე დღის წინ "ქართული ოცნების" პრეზიდენტობის კანდიდატი გიორგი მარგველაშვილი მოსახლეობას შეხვდა. კუს ტბაზე სადაც შეხვედრების შემდეგ კონცერტი გაიმართა კონცერტის დასრულების შემდეგ, ღამის პირველ საათზე, ეს ახალგაზრდები ფეხით გამოუშვეს", - აცხადებენ ორგანიზაციის წარმომადგენლები.