საქართველოში არჩევნების საკითხებზე მომუშავე 11 არასამთავრობო ორგანიზაციის მიერ ცენტრალური საარჩევნო კომისიის თავმჯდომარის პოსტზე წარსადგენი კანდიდატის ვინაობა ხვალ გახდება ცნობილი.
არასამთავრობო ორგანიზაცია "სამართლიანი არჩევნებისა და დემოკრატიის საერთაშორისო საზოგადოების" აღმასრულებელი დირექტორის ნინო ლომჯარიას განცხადებით, პრეზიდენტისთვის ცესკო-ს თავმჯდომარედ წარსადგენი კანდიდატი არაპარტიული, აპოლიტიკური წარსულის მქონე და საარჩევნო ადმინისტრაციის საქმიანობისთვის საჭირო ცოდნის მატარებელია.
ამასთან, ლომჯარია არც უარყოფს და არც ადასტურებს, რომ ცესკო-ს ახალი თავმჯდომარის პოსტზე 11 არასამთავრობო ორგანიზაციის წარმოამდგენელთა არჩევანი გაეროს განვითარების ფონდის საერთაშორსო პროექტების ხელმძღვანელის თამარ ჟვანიას კანდიდატურაა.
"მე მირჩევნია, რომ კანდიდატის ვინაობის დასახელება ერთობლივად მოხდეს, ყველა არასამთავრობო ორგანიზაციის მონაწილეობით. თუმცა არ უარვყოფ, რომ შესაძლებელია თამარ ჟვანიას კანდიდატურაც იყოს. ამ დროისთვის არჩევნებზე მომუშავე 11 ორგანიზაცია შეთანხმებული და ჩამოყალიბებული ვართ ერთ საერთო კანდიდატზე. ჩვენ პრეზიდენტს წარვუდგენთ ერთ კანდიდატურას და მიგვაჩნია, რომ ის თავისი გამოცდილებიდან, წარსულიდან, პიროვნული თვისებებიდან გამომდინარე, როგორც პრეზიდენტისთვის, ასევე ცესკო-ში კოალიცია "ქართული ოცნების" წარმომადგენლებისთვის მისაღები უნდა იყოს. კადიდატი არის არაპარტიული და იმ სფეროში, სადაც არჩევის შემთხვევაში მან უნდა იმუშაოს, ძალიან დიდი გამოცდილება აქვს,"- განაცხადა ნინო ლომჯარიამ.
ცნობისთვის, საქართველოს ცენტრალური საარჩევნო კომისიის თავმჯდომარის პოსტზე საკუთარი კანდიდატის წარსადგენად 11 არასამთავრობო ორგანიზაციას შორის მოლაპარაკებები უკვე დასრულებულია და კონსულტაციების შედეგი ხვალ გახდება ცნობილი.
