რეინტეგრაციის საკითხებში სახელმწიფო მინისტრის თემურ იაკობაშვილის განცხადებით, რუსეთის მიერ სამხედრო ხომალდ "მისტრალის" შეძენის შემდეგ საქართველოს თავდაცვითი შეიარაღების საკითხის წამოჭრა არავის უნდა აკვირვებდეს. აღნიშნული განცხადება იაკობაშვილმა ჟურნალისტებთან საუბარში დიმიტრი მედვედევისა და ნიკოლა სარკოზის განცხადებების კომენტირებისას გააკეთა.
მისივე განმარტებით, საქართველოს ამ პროცესზე გავლენის მოხდენა არ შეუძლია, თუმცა მთავარია, რომ ნებისმიერი გარიგების დროს ჩვენი ქვეყნის ინტერესები დაცული იყოს.
"ინტერესებში შედის ორი რამ. 1 - დროზე მოხდეს საქართველოს ნატოში გაწევრიანება და 2 - გვქონდეს თავდაცვითი იარაღის შეძენის საშუალება. ჩვენ უნდა მოგვეცეს უფლება დავიცვათ სკაუთარი თავი და ეს თუკი რუსეთი მისტრალს შეიძენს არავის უნდა გაუკვირდეს", - განაცხადა იაკობაშვილმა.
შეგახსენებთ, რომ სამხედრო ხომალდ მისტრალის რუსეთისთვის მიყიდვის საკითხი დიმიტრი მედვედევის საფრანგეთში ვიზიტის ფარგლებში მიმდინარე შეხვედრების ერთ-ერთი მთავარი განსახილველი საკითხია.
საფრანგეთის პირველმა პირმა გუშინ უკვე გააკეთა განცხადება იმის შესახებ, რომ ოფიციალური პარიზი რუსეთისთვის სამხედრო ხომალდებს დაამზადებს და მოსკოვს მას შეიარაღების გარეშე მიჰყიდის.
