მიმდინარე წლის 16 აგვისტოს, ყირგიზეთის ფინანსთა სამინისტროს წარმომადგენლებს, რომლებმაც საქართველოს ფინანსთა სამინისტროს აკადემიაში ერთკვირიანი ინტენსიური სასწავლო კურსი გაიარეს, მინისტრის მოადგილემ დავით ლეჟავამ სერტიფიკატები გადასცა.
საქართველოს სასწავლო პროგრამის ფარგლებში, მონაწილეებმა საბიუჯეტო და ეკონომიკური პროცესების ანალიზი და შეფასება შეისწავლეს.
„საქართველოს ფინანსთა სამინისტროს აკადემიაში ტრენინგებს გადიან არამხოლოდ სამინისტროს სისტემის თანამშრომლები, აკადემიაში წარმატებით მიმდინარეობს საერთაშორისო სავალუტო ფონდის სასწავლო კურსი. ამჯერად, ყირგიზეთის ფინანსთა სამინისტროს თხოვნით, მათ თანამშრომლებს ჩაუტარდათ სწავლება ფისკალურ პროგნოზირებასა და დაგეგმვაში. იმედი გვაქვს, ორი ქვეყნის ფინანსთა სამინისტროს შორის თანამშრომლობა გაგრძელდება," - განაცხადა ფინანსთა მინისტრის მოადგილემ, დავით ლეჟავამ.
დელეგაციის წევრებს ქართველმა კოლეგებმა გაუზიარეს საქართველოს ფინანსთა სამინისტროს გამოცდილება. სასწავლო კურსს უძღვებოდნენ ფისკალური პროგნოზირების დეპარტამენტის წარმომადგენლები.
