ივლისში ივნისთან შედარებით სამრეწველო პროდუქციის მწარმოებელთა ფასების ინდექსი 0,6 პროცენტით შემცირდა. „საქსტატის" ინფორმაციით, 2012 წლის ივლისთან შედარებით ინდექსი შემცირდა 3,0 პროცენტით, ხოლო 2005 წლის საშუალოსთან შედარებით კი 58,5 პროცენტით გაიზარდა.
2013 წლის ივლისში 2013 წლის ივნისთან შედარებით ინდექსის ფორმირებაზე ძირითადი გავლენა იქონია ფასების ცვლილებამ შემდეგ სექციებზე:
დამამუშავებელი მრეწველობა: ფასები შემცირდა 0,7 პროცენტით და, შესაბამისად, სექციის წვლილმა ინდექსის პროცენტული ცვლილების საერთო მაჩვენებელში -0,61 პროცენტული პუნქტი შეადგინა. ფასების კლება დაფიქსირდა შემდეგ ქვესექციებზე: საკვები პროდუქტების (სასმელების ჩათვლით) და თამბაქოს წარმოება (1,7 პროცენტი), სატრანსპორტო საშუალებებისა და მოწყობილობების წარმოება (11,4 პროცენტი), დანარჩენი არალითონური მინერალური ნაკეთობების წარმოება (2,7 პროცენტი). ფასები გაიზარდა ქვესექციაზე "ცელულოზა-ქაღალდის მრეწველობა და საგამომცემლო საქმიანობა" (16,2 პროცენტი).
ხოლო 2013 წლის ივლისში 2012 წლის ივლისთან შედარებით ინდექსის ფორმირებაზე ძირითადი გავლენა იქონია ფასების ცვლილებამ შემდეგ სექციებზე:
დამამუშავებელი მრეწველობა: მოცემულ პერიოდში ფასები შემცირდა 4,8 პროცენტით და სექციის წვლილმა ინდექსის პროცენტული ცვლილების წლიურ მაჩვენებელში -3,97 პროცენტული პუნქტი შეადგინა. ფასები შემცირდა მეტალურგიულ მრეწველობასა და ლითონის მზა ნაწარმის წარმოებაზე (11,3 პროცენტი), საკვები პროდუქტების (სასმელების ჩათვლით) და თამბაქოს წარმოებაზე (3,1 პროცენტი), დანარჩენი არალითონური მინერალური ნაკეთობების წარმოებაზე (9,5 პროცენტი). ფასების ზრდა დაფიქსირდა ქვესექციაზე "ცელულოზა-ქაღალდის მრეწველობა და საგამომცემლო საქმიანობა" (18,0 პროცენტი).
