თბილისის მერი გიგი უგულავა თბილისის საკრებულოს დედაქალაქის 2013 წლის ბიუჯეტის გაზრდის მოთხოვნით მიმართავს. თბილისის მერმა საკრებულოში 2013 წლის ბიუჯეტის ცვლილებები წარადგინა, რომელიც სხვადასხვა მიმართულებით ბიუჯეტის კორექტირებას გულისხმობს. ცვლილებების თანახმად, დაგეგმილია მუნიციპალური ტრანსპორტის(ავტობუსების) პარკის განახლება, საბავშვო ბაღების ინფრასტრუქტურის მოწესრიგება, სახელოვნებო სკოლების კეთილმოწყობა და საჭირო ინვენტარით აღჭურვა, შემოერთებულ ტერიტორიებზე მცხოვრები მოსახლეობის სასმელი წყლით უზრუნველყოფა, ასევე თბილისის მერია მზად არის დევნილთა სამინისტროსთან ერთად, თანადაფინანსებით უზრუნველყოს კომპაქტურად ჩასახლებულ დევნილთა საცხოვრებლებში გაზის მრიცხველების დამონტაჟება და ზოგადად ქალაქში სხვადასხვა ახალი ინფრასტრუქტურული პროექტების დაფინანსება.
აღნიშნული ცვლილებებით, ბიუჯეტის მოცულობა 17 მლნ. ლარით გაიზრდება და 740 მლნ. ლარით განისაზღვრება.
იმავდროულად, თბილისის მერმა მზადყოფნა გამოთქვა, საკრებულოს ყველა ფრაქციასთან ითანამშრომლოს და თითოეული საკითხი მათთან ერთად დეტალურად გაიაროს.
