1-ელი ოქტომბრიდან ქუთაისის საერთაშორისო აეროპორტიდან დამატებითი ავიარეისების განხორციელება იგეგმება, აღნიშნულის შესახებ განცხადება ტურიზმის ეროვნული ადმინისტრაციის ხელმძღვანელმა გიორგი სიგუამ გააკეტა. სიგუას განმარტებით, ქუთაისის საერთაშორისო აეროპორტი ავიაკომპანიებს საკმაოდ ხელსაყრელ პირობებს სთავაზობს.
„1-ელი ოქტომბრიდან რეისების რაოდენობა გაიზრდება და ასევე პერმანენტულად მიმდინარეობს მოლაპარაკება სხვადასხვა ავიაკომპანიებთან, რათა მათ შეასრულონ ავიარეისების ქუთაისის საერთაშორისო აეროპორტის მიმართულებით, რომელიც სთავაზობს ძალიან ხელსაყრელ პირობებს ავიაკომპანიებს. ქუთაისის საერთაშორისო აეროპორტი უკვე არის ძალიან მნიშვნელოვანი მიმართულება და მას შესანიშნავი პოტენციალი გააჩნია. დასაქმებულთა რაოდენობა ქუთაისის აეროპორტში გაიზარდა 50 %-ით, მუშაობდა რა 80 ადამიანი, დღეს მისი დატვირთულობიდან გამომდინარე, მუშაობს 160 ადამიანი"- განაცხადა გიორგი სიგუამ.
გიორგი სიგუა განმარტავს, რომ ქუთაისის საერთაშორისო აეროპორტში, რომელიც პრეზიდენტმა თავის დროზე ჯერ კიდევ მშენებარე პროცესში გახსნა, რეისების რაოდენობა 710 %-ით გაიზარდა და არსებულ რეისებს მალე ახალი რეისებიც დაემატება, რაც საქართველოში დამატებითი ტურისტების ჩამოყვანის წინაპირობა გახდება.
„10 თვის განმავლობაში მას შემდეგ რაც ფუნქციონირება დაიწყო ქუთაისის საერთაშორისო აეროპორტმა, რეისების რაოდენობა 10 თვის განმავლობაში გაიზარდა 710 %-ით. დღეს ქუთაისის საერთაშორისო აეროპორტიდან კვირაში 22 საერთაშორისო რეისი სრულდება, რომელსაც 5 ავიაკომპანია ახორციელებს. ეს მიმართულებებია: კიევი. დონეცკი, ხარკოვი, კატოვიცა, ვარშავა, მოსკოვი, მინსკი და ისრაელი, ხოლო რეისებს ახორციელებენ ავიაკომპანიები: Georgian Airways, Wizz Air, „ურალი", „ბელავია" და „სიბირი"- განაცხადა სიგუამ.
სიგია ამბობს, რომ ამ ეტაპზე მიმდინარეობს წარმატებული მოლაპარაკებები სხვადასხვა ავიაკომპანიებთან, რათა ქუთაისის საერთაშორისო აეროპორტიდან შესრულდეს რეისები ტოკიოს, ლონდონის, სტოკჰოლმის და ბევრი სხვა საერთაშორისო მიმართულებით.
„ამ მიმართულებით მიმდინარეობს მოლაპარაკებები როგორც Wizz Air-თან" ასევე Fly Georgia-თან და „უკრაინის საერთაშორისო ავიახაზებთან", - განაცხადა გიორგი სიგუამ.
