ტურიზმის ეროვნული ადმინისტრაციის ხელმძღვანელი საქართველოს პრეზიდენტს სიცრუეში ადანაშაულებს და განმარტავს, რომ ქუთაისის საერთაშორისო აეროპორტი გამართულად მუშაობს და სამომავლოდ კიდევ უფრო დაიტვირთება.
„მე ვარ უფლებამოსილი განვაცხადო, რომ საქართველოს პრეზიდენტი „მიხეილ მიუნჰაუზენი" არის მატყუარა. მას შეცდომაში შეყავს საქართველოს მოსახლეობა და საერთაშორისო საზოგადოება, ისევე როგორც ის ამას 9 წლის განმავლობაში აკეთებდა. მხედველობაში მაქვს, მისი განცხადებები ტურიზმის სფეროში მიმდინარე მოვლენებზე და განსაკუთრებით ქუთაისის საერთაშორისო აეროპორტზე. დავიწყებ იმით, რომ მიმდინარე წელს, ივლისში საერთაშორისო მოგზაურების რეკორდული რაოდენობა დაფიქსირდა. ივლისში ამ მაჩვენებელმა 609 ათას 189 საერთაშორისო მოგზაური შეადგინა. 2013 წლის შვიდი თვის მონაცემებით, საქართველოში საერთაშორისო მოგზაურების რაოდენობამ 2 მლნ 797 ათას 910 მოგზაური შეადგინა, რაც წინა წლის ანალოგიურ პერიოდთან შედარებით 26% -ითა გაზრდილი. განსაკუთრებული ზრდა არის პოლონეთიდან და უკრაინიდან, რაც განაპირობა დამატებითი ავიარეისების დანიშვნამ, ამ მიმართულებით თბილისის და განსაკუთრებით ქუთაისის აეროპორტებიდან"- განაცხადა ტურიზმის ეროვნული ადმინისტრაციის ხელმძღვანელმა გიორგი სიგიუამ დღეს გამართულ ბრიფინგზე, რითაც ის პრეზიდენტისა და საპარლამენტო უმცირესობის წარმომადგენლის, გიორგი კანდელაკის მიერ გაკეთებულ განცხადებებს გამოეხმაურა.
გიორგი სიგუა განმარტავს, რომ ქუთაისის საერთაშორისო აეროპორტში, რომელიც პრეზიდენტმა თავის დროზე ჯერ კიდევ მშენებარე პროცესში გახსნა, რეისების რაოდენობა 710 %-ით გაიზარდა და არსებულ რეისებს მალე ახალი რეისებიც დაემატება, რაც საქართველოში დამატებითი ტურისტების ჩამოყვანის წინაპირობა გახდება.
„რაც შეეხება „მიხეილ მიუნჰაუზენისა" და მისი დამქაშების განცხადებას, რომ თითქოს ქუთაისის საერთაშორისო აეროპორტი ვერ მუშაობს და მას საქართველოს მთავრობა ვერ უვლის, გეტყვით, რომ 10 თვის განმავლობაში მას შემდეგ რაც ფუნქციონირება დაიწყო ქუთაისის საერთაშორისო აეროპორტმა და რომელიც „მიხეილ მიუნჰაუზენმა" დაუმთავრებელი გახსნა. ამ დაუმთავრებელ პირობებში მოხერხდა ის, რომ რეისების რაოდენობა 10 თვის განმავლობაში გაიზარდა 710 %-ით. დღეს ქუთაისის საერთაშორისო აეროპორტიდან კვირაში 22 საერთაშორისო რეისი სრულდება, რომელსაც 5 ავიაკომპანია ახორციელებს.
ეს მიმართულებებია: კიევი. დონეცკი, ხარკოვი, კატოვიცა, ვარშავა, მოსკოვი, მინსკი და ისრაელი, ხოლო რეისებს ახორციელებენ ავიაკომპანიები: Georgian Airways, Wizz Air, „ურალი", „ბელავია" და „სიბირი".
1-ელი ოქტომბრიდან რეისების რაოდენობა გაიზრდება და ასევე პერმანენტულად მიმდინარეობს მოლაპარაკება სხვადასხვა ავიაკომპანიებთან, რათა მათ შეასრულონ ავიარეისების ქუთაისის საერთაშორისო აეროპორტის მიმართულებით, რომელიც სთავაზობს ძალიან ხელსაყრელ პირობებს ავიაკომპანიებს. ქუთაისის საერთაშორისო აეროპორტი უკვე არის ძალიან მნიშვნელოვანი მიმართულება და მას შესანიშნავი პოტენციალი გააჩნია. დასაქმებულთა რაოდენობა ქუთაისის აეროპორტში გაიზარდა 50 %-ით, მუშაობდა რა 80 ადამიანი დღეს მისი დატვირთულობიდან მუშაობს 160 ადამიანი"- განაცხადა გიორგი სიგუამ.
მისივე განმარტებით, მიმდინარეობს წარმატებული მოლაპარაკებები სხვადასხვა ავიაკომპანიებთან, რათა ქუთაისის საერთაშორისო აეროპორტიდან შესრულდეს რეისები ტოკიოს, ლონდონის, სტოკჰოლმის და ბევრი სხვა საერთაშორისო მიმართულებით.
„ამ მიმართულებით მიმდინარეობს მოლაპარაკებები როგორც Wizz Air-თან" ასევე Fly Georgia-თან და „უკრაინის საერთაშორისო ავიახაზებთან". ასე, რომ ის თითქოს ქუთაისის საერთაშორისო აეროპორტს რაიმე უჭირს, ვერ ასრულებს საკუთარ მოვალეობას და ვერ იყენებს საკუთარ დატვირთვას - ეს არის მოკლეფეხიანი ტყუილი, რომელიც „მიხეილ მიუნჰაუზენს" ჩვევია"- განაცხადა გიორგი სიგუამ.
შეგახსენებთ, რომ საპარლამენტო უმცირესობის წევრ გიორგი კანდელაკის განცხადებით, პოლონეთში იაფი ფრენები, არის იმ გეგმის მხოლოდ 10%, რაც უნდა ამუშავებულიყო.
"რაც შეეხება ქუთაისის აეროპორტსა და იაფ ფრენებს. მინდა ხაზგასმით აღვნიშნო, რომ რაც ეხლა (ინერციით) არსებობს, მათ შორის პოლონეთში იაფი ფრენები, არის იმ გეგმის მხოლოდ 10% რაც უნდა ამუშავებულიყო. როგორც ადრე ვთქვი, მთავარი ფსონი კეთდებოდა მგზავრების რაოდენობით მსოფლიოში პირველ ავიაკომპანია "რაინეარზე". უკვე მაისიდან "რაინეარს" უნდა გაეხსნა ოთხი მიმართულება (სავარაუდოდ, ბრიუსელი, ბარსელონა, მილანი, ფრანკფურტ-ჰანი), შემდეგ კიდევ - ოთხი, შემდეგ კიდევ ოთხი და ა.შ. და ორ წელიწადში ასულიყო მილიონ მგზავრზე. ბილეთის საშუალო სტატისტიკური ფასი უნდა ყოფილიყო 50 ევრო. ეს ნიშნავდა არა მხოლოდ სრულიად სხვა - სპეციფიურად ევროპელი საშუალო კლასის ტურისტების - დღეისათვის არარსებული ნაკადის გაჩენას, არამედ რეალობის ცვლილებას ჩვენი მოქალაქეებისთვის, განსაკუთრებით კი - ახალგაზრდებისთვის. უვიზო მიმოსვლას ადრე თუ გვიან მაინც მივიღებთ და დიდი თავის ტკივილის გარეშე ჩვენი ახალგაზრდებისთვის ევროპაში მოხვედრის ხელმისაწვდომობა მათ ცხოვრებას ბევრი სხვადასხვა თვალსაზრისით შეცვლიდა. მე ვწუხვარ, რომ დღევანდელი მთავრობა ამ პროექტს ქილიკით უყურებს და ვბრაზობ, რომ "რაინეარი", რომლის შემოსვლაც არაევროკავშირის ქვეყანაში Financial Times-ის პირველ გვერდზე მოხვედრის გარნტიაა, აღარავის გახსოვთ. ცნობისათვის, "რაინეარი", რომელიც მხოლოდ ევროკავშირის შიგნით (და მაროკოში) დაფრინავს, მგზავრთა რაოდენობით არის მსოფლიოში პირველი ავიაკომპანია და მისი ბილეთის საშუალო სტატისტიკური ფასი 32 ევროა", - წერს კანდელაკი საკუტარ სოციალურ ქსელში.
თავის მხრივ კი პრეზიდენტ მიხეილ სააკაშვილის განცხადებით, "თუ ვინმე უნდა დაიჭირონ, ეს არის გიორგი კანდელაკი".
ამის შესახებ ქვეყნის პირველმა პირმა პოლონეთის ყოფილ პრემიერმინისტრ იაროსლავ კაჩინსკისთან შეხვედრის შემდეგ გამართულ ერთობლივ პრესკონფერენციაზე განაცხადა.
"მე მინდა გითხრათ, რომ გიორგი კანდელაკი იყო მამა და ინიციატორი ქუთაისის აეროპორტის შექმნის და ქუთაისის აეროპორტზე აღძრულია სისხლის სამართლის საქმე, როგორც არამიზნობრივ ხარჯზე და მინდა ვთქვა, რომ თუ ვინმე უნდა დაიჭირონ, ეს არის გიორგი კანდელაკი. მე არაფერ შუაში ვარ. ქუთაისის აეროპორტი არის კანდელაკის გაკეთებული და ათასობით პოლონელი ტურისტი დადის კანდელაკის გაკეთებულ აეროპორტში. ამ პოლონელების ჩამოყვანისთვის და ამ ყველაფრის გაკეთებისთვის კანდელაკი არის დასაჭერი. დასაჭერი მე ჩემი საკმარისიც მეყოფა რაზეც მედავებიან", - განაცხადა სააკაშვილმა.
