,,სამართლიანი სასამართლოს პირობებში გამამართლებელ განაჩენს მოველოდი", _განაცხადა ჟურნალისტებთან ბაჩო ახალაიას მამამ როლანდ ახალაიამ სასამართლოს მიერ მიღებული გადაწყვეტილების კომენტირებისას.
მისივე განმარტებით, არ შეიძლებოდა, ბაჩო ახალაიას მიმართ შეთითხნილი ბრალდებები გამამტყუნებელი განაჩენის საფუძველი გამხდარიყო.
,,სასამართლო პროცესებზე კიდევ ერთხელ დავრწმუნდი, რომ მოგონილი ბრალდებები, რომელიც შეთითხნილი იყო არ შეიძლებოდა გამამტყუნებელი განაჩენის საფუძველი გამხდარიყო. სიმართლე რომ გითხრათ შინაგანად განწყობილი ვიყავი, რომ სასამართლო და მართლმსაჯულება თუ სამართლიან სიტყვას იტყოდა უეჭველად მოველოდი გამამართლებელ განაჩენს, რაც დღეს დადასტურდა", _განაცხადა როლანდ ახალაიამ.
შეგახსენებთ, რომ თბილისის საქალაქო სასამართლომ ბაჩო ახალაია თავდაცვის მინისტრობის პერიოდზე წაყენებულ ბრალში უდანაშაულოდ სცნო და აღმკვეთი ღონისძიება პატიმრობა გააუქმა. სასამართლომ ასევე უდანაშაულოდ სცნო საქმეზე დაკავებული შვიდი პირიც.
საქართველოს თავდაცვის ყოფილ მინისტრს ბაჩო ახალაიასა და მასთან ერთად ბრალდებულების, სამხედროების მიმართ არაადამიანური მოპყრობისა და ზვიად აბესაძისთვის თავისუფლების უკანონო აღკვეთის საქმეზე გადაწყვეტილება მოსამართლემ დღეს გამოაცხადა.
ახალაიასთან ერთად, ამ საქმეზე ბრალდებული იყო კიდევ 7 პირი, მათ შორის გაერთიანებული შტაბის ყოფილი უფროსი გიგი კალანდაძე, მე-4 ქვეითი ბრიგადის ყოფილი ხელმძღვანელი ზურაბ შამათავა, სად-ის წარმომადგენელი გაგა მკურნალიძე, სერჟანტი ალექსანდრე გორდაძე, მერაბ კიკაბიძე, მანუჩარ დარასელია და გიორგი კინწურაშვილი.
დარასელია და კინწურაშვილი ძებნილებად ითვლებიან, ხოლო კალანდაძე, გორდაძე, კიკაბიძე და შამათავა გირაოთი არიან პატიმრობიდან გათავისუფლებული.
