საპრეზიდენტო არჩევნებში "ნაციონალური მოძრაობის" პრეზიდენტობის კანდიდატი დავით ბაქრაძე იქნება. პრაიმერის საბოლოო შედეგები, თბილისის მასშტაბით ასე გადანაწილდა - პირველ ადგილზე გავიდა დავით ბაქრაძე, მეორე ადგილზე გიორგი ბარამიძე, მესამეზე - ზურაბ ჯაფარიძე, მეოთხეზე - შოთა მალაშხია. შედეგები "ექსპო-ჯორჯიაში" გამართულ შემაჯამებელ პრაიმერზე გამოცხადდა.
„ნაციონალური მოძრაობის" საპრეზიდენტო კანდიდატის გამოსავლენ პრაიმერში დავით ბაქრაძე, გიორგი ბარამიძე, ზურაბ ჯაფარიძე და შოთა მალაშხია იღებდნენ მონაწილეობას.
ბაქრაძემ ასევე გაიმარჯვა ქუთაისში, გორში, თელავში, ზუგდიდში და ბათუმში გამართულ პრაიმერში.
შემაჯამებელ პრაიმერზე გამოცხადდა ონლაინ გამოკითხვის შედეგებიც, რომელიც ერთი თვის განმავლობაში მიმდინარეობდა. აღნიშნული შედეგების მიხედვითაც ლიდერობს დავით ბაქრაძე, მეორე ადგილზე - ზურაბ ჯაფარიძე, მესამეზე - გიორგი ბარამიძე, მეოთხეზე კი - შოთა მალაშხიაა.
"ნაციონალური მოძრაობის" პრაიმერის პარალელურად დღეს „ექსპო ჯორჯიასთან" საპროტესტო აქცია გამართეს პარტია "თავისუფალი საქართველოს", ასევე, არასამთავრობო ორგანიზაცია "ყოფილი პოლიტპატიმრები ადამიანის უფლებებისთვის" წევრებმა.
