დღეს საკრებულოს რიგგარეშე სხდომა გაიმართება. დღევანდელ სხდომაზე სავარაუდოდ, თანამდებობას თბილისის საკრებულოს თავმჯდომარეს ზაალ სამადაშვილს დაატოვებინებენ.
სხდომის დღის წესრიგში ასევე თავმჯდომარის პირველი მოადგილისა და 13 კომისიის თავმჯდომარეების არჩევის საკითხი განიხილება. სხდომაში მონაწილეობას არ მიიღებენ "ნაციონალური მოძრაობის" წევრები, რომლებიც ამბობენ, რომ ერთ სხდომაზე საკრებულოს თავმჯდომარის გადარჩევა და ახლის არჩევა კანონით არ შეიძლება.
არ არის გამორიცხული, საკრებულოს სხდომის შემდეგ დღესვე კიდევ ერთი რიგგარეშე სხდომა დაინიშნოს. ახალი უმრავლესობა თავმჯდომარის პოსტზე, სავარაუდოდ, ფრაქცია „თავისუფლების" თავმჯდომარე ირაკლი შიხიაშვილის კანდიდატურას წარადგენს.
ფრაქცია „ქართული ოცნება - თბილისელების" თავმჯდომარე გულიკო ზუმბაძე შიხიაშვილის კანდიდატურას მხარს არ უჭერს, თუმცა უმრავლესობის 25 წევრიდან 24 ხმაც საკმარისია.
თბილისის საკრებულოს სხდომის მიმდინარეობას არასამთავრობო სექტორი დააკვირდება. ორგანიზაციებს სხდომის მონიტორინგისკენ კოკი იონათამიშვილმა მოუწოდა. მისი თქმით, საკრებულოს წევრები მზად არიან ნებისმიერ არასამთავრობო ორგანიზაციასთან ითანამშრომლონ, რაც ხელს შეუწობს საზოგადოების უკეთ ინფორმირებულობას. დღევანდელ სხდომაზე დასწრებას რამდენიმე არასამთავრობო ორგანიზაცია გეგმავს. საკრებულოს სხდომა 16:00 საათზეა დანიშნული.
შეგახსენებთ, რომ საკრებულოს ჯერ კიდევ მოქმედ თავმჯდომარეს ზალ სამადაშვილს პოსტი 2010 წლიდან უკავია. იგი ვაკის მაჟორიტარი დეპუტატია.
