სოფელ ვეჯინში მდებარე თევზსაჭერი მეურნეობების მფლობელები სოფლის მეურნეობის სამინისტროს დაქვემდებარებაში მყოფ კომპანიას „ქვემო ალაზნის სისტემურ სამმართველოს" ფინანსურ რეკეტში ადანაშაულებენ.
როგორც ფერმერებმა კახეთის საინფორმაციო ცენტრს განუცხადეს, ქვემო ალაზნის სისტემური სამმართველო, რომელიც ალაზნის სარწყავ არხს მართავს, ფერმერების საკუთრებაში არსებულ მეურნეობებს წყლის მიწოდებით ვერ უზრუნველყოფს, თუმცა მათგან წყლის გადასახადს ითხოვს, წინააღმდეგ შემთხვევაში კი სოლიდური თანხებით აჯარიმებს. ფერმერების განცხადებით, მათ საკუთრებაში არსებული ტბები ნაჟური წყლით მარაგდება, რასაც გარემოს დაცვის სამინისტროს მიერ გაცემული დოკუმენტებიც ადასტურებს.
მათივე თქმით, ნაჟური წყლებიც პესტიციდებით არის დაბინძურებული, რის გამოც თევზი იხოცება.
„ქვემო ალაზნის სისტემურ სამმართველოს" ვეჯინში მცხოვრები გლეხებიც უჩივიან. მათი განცხადებით, კომპანიის გაუმართავი ინფრასტრუქტურის გამო 500 ჰექტრამდე ტერიტორია დაჭაობებულია და დატბორვა დიდი რაოდენობით სახნავ - სათეს ნაკვეთებსაც ემუქრება.
საქართველოს გაერთიანებული სამელიორაციო სისტემების კომპანიაში კახეთის საინფორმაციო ცენტრს განუცხადეს, რომ ამ საკითხზე კომენტარს მოგვიანებით გააკეთებენ.
