„დემოკრატიული მოძრაობა" ყოველთვის გმობდა და დღესაც ერთმნიშვნელოვნად გმობს ყოველგვარ ძალადობას. ასევე მიუღებლად მიგვაჩნია ყოველგვარი რევანში. ამავდროულად, ჩვენ გვესმის ხალხის პროტესტი, ჩვენ გვესმის მათი რეაქცია „ნაციონალური მოძრაობის" წარმომადგენელთა უტიფარ და პროვოკაციულ მოქმედებებსა და განცხადებებზე.
ბოლო დღეების განმავლობაში მედიაში გამუდმებულად არის საუბარი „ნაციონალური მოძრაობის" წინააღმდეგ გამართულ საპროტესტო აქციებზე ზუგდიდსა და ბათუმში. „ნაციონალური მოძრაობის" ლიდერები, რომლებიც წინა ხელისუფლებაში უმაღლეს პოსტებს იკავებდნენ და დღესაც ინარჩუნებენ - ბატონები ბაქრაძე, ბოკერია, წერეთელი და სხვები, აღშფოთებას ვერ ფარავენ. მათთვის თურმე მიუღებელია ძალადობა.
ბატონებო!
როდესაც თქვენ ასეთ მდგომარეობაში აღმოჩნდებით ყოველთვის გახსოვდეთ წლების მანძილზე თქვენი ნამოქმედარი!
მოგიყვანთ მხოლოდ ერთ, ხურვალეთის მაგალითს, როდესაც „დემოკრატიული მოძრაობის" თავმჯდომარეს ნინო ბურჯანაძეს და ჩვენი პარტიის წვრებს 26 მაისის დარბევის რეპეტიცია მოგვიწყვეთ. ხურვალეთის მოსახლეობასთან შესახვედრად ჩასულებს დაგვახვედრეთ ზონდერბრიგადები, რომლებმაც მოგვაქციეს ალყაში და დაგვიშინეს ქვები, საიდანაც დაშავების გარეშე ვერ გამოაღწია ვერც ერთმა ჩვენგანმა და რომ არა ადგილობრივი მოსახლეობის წარმომადგენელთა დახმარება და მხარდაჭერა, ჩვენ საერთოდ ვერ მოვახერხებდით ამ ალყის გარღვევას.
ამ ყველაფერს კი რამდენიმე მეტრის მოშორებით ურეაქციოდ აკვირდებოდნენ თქვენი „პოლიტიკური პოლიციის" წარმომადგენლები.
მაშინ ჩვენ გავმართეთ არაერთი ბრიფინგი ამ ინცინდენტთან დაკავშირებით, მივმართეთ შინაგან საქმეთა მინისტრს ვანო მერაბიშვილს. თუმცა ჩვენს მიმართვასა და საჩივარს შინაგან საქმეთა სამინისტროში არანაირი რეაგირება არ მოჰყოლია.
ამ ინციდენტს ასევე არ მოჰყოლია რეაგირება არც მაშინდელი პარლამენტის თავმჯდომარე დავით ბაქრაძისაგან, არც დეპუტატი - ექიმი გიგი წერეთლისაგან, არც უშიშროების საბჭოს თავმჯდომარე გიგა ბოკერიასაგან, მაშინდელი უმაღლესი თანამდებობის არც ერთი პირისაგან.
ჩვენი საჩივარი შინაგან საქმეთა სამინისტროში დღემდე რჩება. მივმართავთ შინაგან საქმეთა მინისტრს ირაკლი ღარივბაშვილს, რომ გამოიძიოს ხურვალეთის ინციდენტი.
„დემოკრატიული მოძრაობა" კიდევ ერთხელ აცხადებს: ქვეყანაში ძალადობა მხოლოდ მაშინ დასრულდება, როდესაც ყველა დაინახავს, რომ დამნაშავეები ადექვატურ პასუხს აგებენ მათ მიერ ჩადენილი დანაშაულისათვის.
მივმართავთ ხელისუფლებას, რომ გამოიყენოს მის ხელთ არსებული ყველა კანონიერი და სამართლიანი რესურსი და დააჩქაროს გაუგებარი კოჰაბიტაციით შეჩერებული სამართლიანობის დამყარების პროცესი.
ეს სჭირდება ქვეყანას!
წინააღმდეგ შემთხვევაში საქართველოში სამოქალაქო მშვიდობას საფრთხე ემუქრება.