ლატვიის ქალაქ ვენსტპილსის მუნიციპალიტეტმა ბოდიში მოიხადა მათ ქალაქში არსებულ გლობუსზე საქართველოსა და აფხაზეთის ცალკე ქვეყნებად მონიშვის ფაქტის გამო და კიდევ ერთხელ დაადასტურა ლატვიის ურყევი მხარდაჭერა საქართველოს ტერიტორიული მთლიანობისა და სუვერენიტეტისადმი
საქართველოს საელჩო ლატვიის რესპუბლიკაში ქ. ვენსტპილსის მუნიციპალიტეტის მაღალი თანამდებობის პირებს დაუკავშირდა, მიაწოდა ინფორმაცია ქ.ვენსტპილსში მდებარე გლობუსზე აფხაზეთის ცალკე ქვეყნად დატანებასთან დაკავშირებით და შესაბამისად გამოთქვა შეშფოთება. ნათქვამია ლატვიის რესპუბლიკაში საქართველოს საელჩოს მიერ საგენტო „ჯი-ეიჩ-ენისათვის" გამოგზავნილ წერილში.
მათივე ინფორმაციით, ქ. ვენსტპილსის მუნიციპალიტეტის თანამშრომლებმა მოახდინეს დაუყონებლივი რეაგირება და ადგილზე გააგზავნეს სპეციალური ჯგუფი.
„მათი ინფორმაციის თანახმად, მუნიციპალიტეტი დაუყონებლივ მიიღებს შესაბამის ზომებს და გამოასწორებს აღნიშნულ გლობუსზე დაშვებულ შეცდომას.
ქ. ვენსტპილსის მუნიციპალიტეტმა ბოდიში მოიხადა ამ ფაქტთან დაკავშირებით და კიდევ ერთხელ დაადასტურა ლატვიის ურყევი მხარდაჭერა საქართველოს ტერიტორიული მთლიანობისა და სუვერენიტეტისადმი", _ ნათქვამია წერილში.
შეგახსენებთ, რომ ლატვიის ქალაქ ვენტსპილსში მყოფმა "ჯი-ეიჩ-ენის" ჟურნალისტმა აღმოაჩინა, რომ ქალაქის საბავშო-გასართობი პარკის „ფანტაზიის" შესასვლელში დაგმულ დიდი გლობუსზე საქართველო და აფხაზეთი ცალ-ცალკე ფერებად ანუ სხვა და სხვა ქვეყნებად არის დატანილი. საქართველოს დედაქალაქად თბილისი, აფხაზეთის კი - სოხუმია აღნიშნულია. "ჯი-ეიჩ-ენის" ჟურნალისტი შეეცადა პარკის ადმინისტრაცისტან გაერკვია აღნიშნულის შესახებ , თუმცა მათ განაცხადეს რომ ეს მათ კომპეტენციას სცილდება. "ჯი-ეიჩ-ენი" ლატვიაში საქართველოს საელჩოს დაუკავშირდა და ვითრებაში გარკვევა სთხოვა.
ცნობისთვის, ვენტსპილსი ლატვიაში სიდიდით მეექვსე ქალაქია, სადაც 2011 წლის აღწერის მონაცემებით, ქალაქის მოსახლეობამ 43 ათასი შეადგინა. ქალაქის ფართობი 55,4 კმ²-ს შეადგენს.