,,როგორც მოგეხსენებათ, საქართველოს პრეზიდენტის 2013 წლის 4 ივლისის #04/07/01 განკარგულებით, საქართველოს პრეზიდენტის მორიგი არჩევნები 2013 წლის 27 ოქტომბერს ჩატარდება. რომელსაც სურს არჩევნებში მონაწილეობის მიღება, საკონსულო აღრიცხვაზე (თუ უკვე არ იმყოფება) 2013 წლის 6 ოქტომბრის ჩათვლით უნდა დადგეს, ან გაიაროს რეგისტრაცია საზღვარგარეთ საქართველოს დიპლომატიურ წარმომადგენლობაში/საკონსულო დაწესებულებაში ან საზღვარგარეთ შექმნილ საუბნო საარჩევნო კომისიაში. საკონსულო აღრიცხვაზე დადგომა საკმაოდ მარტივი პროცედურაა და მისი განხორციელება შესაძლებელია: 1. საქართველოს დიპლომატიურ წარმომადგენლობაში/საკონსულო დაწესებულებაში გამოცხადებით ან საქართველოს დიპლომატიურ წარმომადგენლობაში/საკონსულო დაწესებულებაში საფოსტო გზავნილის მეშვეობით შესაბამისი დოკუმენტაციის გაგზავნით. ორივე შემთხვევაში საკმარისია მხოლოდ განცხადება-ანკეტის წარმოდგენა. რაიმე დამატებითი დოკუმენტის წარმოდგენა არ მოითხოვება. 2. სახელმწიფო სერვისების განვითარების სააგენტოს მეშვეობით. სააგენტოს მეშვეობით საკონსულო აღრიცხვაზე დადგომა ხორციელდება ონლაინ-რეჟიმში შემდეგი ვებ-გვერდის - http://intpass.cra.ge/ConsularMain.aspx მეშვეობით. ამისათვის საჭიროა მხოლოდ განცხადება-ანკეტის შევსება და განმცხადებლისა და განაცხადის მიღებაზე უფლებამოსილი პირის პირდაპირი ვიზუალური კონტაქტის დამყარება (skype)", - ნათქვამია საგარეო საქმეთა სამინისტროს განცხადებაში.