დღეს, 24 ივლისს, 12:00 საათზე, პარლამენტის რიგგარეშე სხდომაზე, საარჩევნო კოდექსში და "მოქალაქეთა პოლიტიკური გაერთიანებების შესახებ" კანონში დაგეგმილი ცვლილებებზე იმსჯელებენ.
"საარჩევნო კოდექსში" შესატანი ცვლილებები პარლამენტს ოთხი სხვადასხვა პროექტის სახით წარედგინა.
ინტერფრაქციული ჯგუფის ფარგლებში მომზადებული ინიციატივებით, არჩევნებში ადმინისტრაციული რესურსის გამოყენების შესაძლებლობა იზღუდება. დგინდება იმ თანამდებობების ჩამონათვალი, რომელიც პრეზიდენტობის კანდიდატობასთან არის შეუთავსებელი.
ცვლილებები არჩევნებთან დაკავშირებით შექმნილ უწყებათაშორის კომისიასაც შეეხება, რომელიც უშიშრობის საბჭოს დაქვემდებარებიდან იუსტიციის სამინისტროს დაქვემდებარებაში გადადის.
ცვლილების თანახმად, შემოდის საარჩევნო სიის ბიომეტრიული პარამეტრებით ფორმირებების წესი. ამავე ცვლილებების ფარგლებში გათვალისწინებულია დაურეგისტრირებელი ამომრჩევლისთვის 27 ოქტომბრის საპრეზიდენტო არჩევნებში ხმის მიცემის შესაძლებლობა.
რაც შეეხება "მოქალაქეთა პოლიტიკური გაერთიანებების შესახებ" კანონს და მასში დაგეგმილ ცვლილებებს, პროექტის მიხედვით, პარტიებს შემოწირულობების მიღების კუთხით ამჟამად არსებული შეზღუდვები მოეხსნებათ. ცვლილება არ ეხება საბიუჯეტო დაფინანსების მიღების წესებს.
