,,ქართულ-აფხაზური და ქართულ-ოსური სახლის" ლიდერი და პრეზიდენტობის კანდიდატის ნესტან კირთაძის განცხადებით, მას ბრიუსელში მაია ფანჯიკიძის პრესკონფერენციაზე დასწრების შესაძლებლობა არ მისცეს. როგორც კირთაძე განმარტავს მას კითხვები ჰქონდა ვილნიუსის სამიტთან დაკავშირებით და მინისტრის მრჩევლებმა მას მოსთხოვეს, რომ აღნიშნული შეკითხვები არ დაესვა.
,, ძალიან, ვწუხვარ, რომ საქართველოს ხელისუფლება არა მხოლოდ ჩვენს სამშობლოში არამედ ევროკავშირის დედაქალაქშიც ამჟღავნებს არაპროფესიონალიზმს, არადემოკრატიულობას. ბრიუსელის პრესკლუბში ვიყავი, სადაც გამოცხადებული იყო ეს შეხვედრა, მაგრამ საგარეო საქმეთა მინისტრი გაექცა ჩემთან ურთიერთობას. არ ვიცი რატომ გამოგზავნა მან ჩემთან უცხოელი თანაშემწეები, რომლებმაც მთხოვეს, რომ კითხვა არ დამესვა, პრესის წინაშე რაიმე პოზიცია არ გამომექვეყნებინა და შემდეგ შევიდნენ უფრო კამერულ დარბაზში და ღია პრესკონფერენცია მედიისთვის რატომღაც დახურული აღმოჩნდა", - განაცხადა ჟურნალისტებთან კირთაძემ.
შეგახსენებთ, რომ დღეს, ბრიუსელში „აღმოსავლეთ პარტნიორობის" რიგით მეოთხე მინისტერიალი იხსნება, რომელსაც უხელმძღვანელებს საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენელი, ევროკომისიის ვიცე-პრეზიდენტი, ქეთრინ ეშტონი.
მინისტერიალში მონაწილეობას მიიღებენ, გაფართოებისა და ევროპული სამეზობლო პოლიტიკის საკითხებში ევროკომისარი, შტეფან ფულე, ევროკავშირის წევრი ქვეყნებისა და „აღმოსავლეთ პარტნიორობის" ექვსივე ქვეყნის საგარეო საქმეთა მინისტრები და მაღალი რანგის სხვა ოფიციალური პირები. ბრიუსელში იმყოფება საქართველოს საგარეო საქმეთა მინისტრი მაია ფანჯიკიძე.
