პოლიტიკური პარტიების ფინანსური მონიტორინგის სამსახურმა პარტიებს და საინიციატივო ჯგუფებს სხვადასხვა ინფორმაციის წარდგენის ფორმებისა და ახალი რეგულაციების ვადები გააცნო.
დღევანდელ შეხვედრაზე მონიტორინგის სამსახურმა პოლიტიკურ სუბიექტებს საქართველოს 2013 წლის არჩევნებისთვის საარჩევნო კამპანიის დაფინანსებასთან დაკავშირებული ზოგიერთი საკითხის მოწესრიგების შესახებ ბრძანება გააცნო.
როგორც სახელმწიფო აუდიტის სამსახურის პოლიტიკური პარტიების მონიტორინგის სამსახურის უფროსის მოვალეობის შემსრულებელმა ზურაბ აზნაურაშვილმა განაცხადა, პოლიტიკური პარტიები კანდიდატის რეგისტრაციიდან 5 დღის ვადაში ვალდებული არიან გახსნან საარჩევნო კამპანიის ფონდი და მხოლოდ აღნიშნული ფონდის სახსრებით დააფინანსონ წინასაარჩევნო კამპანიის ხარჯები.
მისივე განმარტებით პირებს, რომელთაც აქვთ უფლება არჩევნებში საპრეზიდენტო კანდიდატი წარადგინონ ვალდებული არიან არჩევნების გამოცხადების დღიდან სამ კვირაში ერთხელ წარმოადგინოს ქონებრივი დეკლარაცია.
,,ამასთანავე ყველა პოლიტიკური პარტია, რომელსაც გავლილი აქვს რეგისტრაცია ცენტრალურ საარჩევნო კომისიაში და უფლებამოსილია საპრეზიდენტო კანდიდატი წარადგინოს, ვალდებულია არჩევნების გამოცხადების დღიდან სამ კვირაში ერთხელ წარმოადგინოს ფინანსური დეკლარაცია", -განაცხადა ზურაბ აზნაურაშვილმა.
