საქართველოს ფინანსთა მინისტრის, ნოდარ ხადურის ხელმძღვანელობით გაიმართა ფინანსთა მინისტრის მრჩეველთა საბჭოს სხდომა, რომელზეც საბჭოს წევრებმა ისაუბრეს ქვეყნის განვითარების სტრატეგიული დოკუმენტის შესახებ. საბჭოს სხდომაში მონაწილეობა მიიღეს ეკონომიკისა და მდგრადი განვითარების სამინისტროსა და ბიზნესასოციაციის წარმომადგენლებმა.
შეხვედრაზე ფინანსთა, ეკონომიკისა და მდგრადი განვითარების სამინისტროებმა მრჩეველთა საბჭოს გააცნეს საქართველოს ძირითადი მონაცემების და მიმართულებების დოკუმენტის სამუშაო ვარიანტი, ასევე განიხილეს ფინანსთა მინისტრის მრჩეველთა საბჭოს წევრების მიერ წარმოდგენილი შენიშვნები და წინადადებები.
„შედგა ძალიან საინტერესო დიალოგი იმ პრობლემებზე, რომლის წინაშეც დგას საქართველოს ეკონომიკა, იმ გზებზე თუ როგორ უნდა გამოვიდეს ქვეყანა ამ პრობლემებიდან და როგორი უნდა იყოს თუნდაც 10 წლის შემდეგ. იმედი მაქვს, რომ უახლოეს პერიოდში ჩვენ უკვე რეალურად შევძლებთ კარგი დოკუმენტის შექმნას და საზოგადოებისთვის წარდგენას," - განაცხადა ფინანსთა მინისტრმა ნოდარ ხადურმა.
„ჩვენი შეხვედრები ფინანსთა სამინისტროს ინიციატივით სათათბირო საბჭოს ფორმატში ინტენსიურად მიმდინარეობს. ვფიქრობ, ასეთი შეხვედრები საფუძველს იძლევა შეჯერებული დოკუმენტი გამოვიდეს. პრაქტიკა, როდესაც სამინისტრო ასე მუშაობს ეკონომიკურ საზოგადოებასთან არცთუ გავრცელებულია და ვიმედოვნებ იქნება წარმატებული," - განაცხადა მრჩეველთა საბჭოს წევრმა, აკადემიკოსმა ლადო პაპავამ.
„დოკუმენტის მთავარი არსი უნდა იყოს ორიენტირება ისეთ ეკონომიკურ ზრდაზე, რომელიც აისახება არა მარტო ზოგად ეკონომიკურ მაჩვენებლებზე, არამედ თითოეულ ადამიანზე. შედგა ნაყოფიერი განხილვა და მიმაჩნია, საბოლოოდ, კარგი დოკუმენტი შემუშავდება," - განაცხადა მრჩეველთა საბჭოს წევრმა, პროფესორმა, მიხეილ ჯიბუტმა.
„მნიშვნელოვანია, რომ ღიად მიმდინარეობს დოკუმენტის იმ მოდელზე საუბარი, რაც სჭირდება საქართველოს. ყველა სექტორის, მიმართულების მიხედვით ხდება იდეების კონცენტრირება, შემდეგ შენიშვნებისა და მოსაზრებების განხილვა. საბოლოოდ, დოკუმენტის იმპლემენტაცია მოგვცემს შედეგს, რომელსაც ჩვენი საზოგადოება ელოდება," - განაცხადა საბჭოს წევრმა, პროფესორმა ემზარ ჯგერენაიამ.
ქვეყნის სტრატეგიის ამსახველი დოკუმენტის შედგენაზე საქართველოს პრემიერ-მინისტრის დავალებით მუშაობენ ფინანსთა, ეკონომიკისა და მდგრადი განვითარების სამინისტროები. დოკუმენტში განსაზღვრული იქნება ქვეყნის განვითარების ძირითადი პრიორიტეტები და ის ფინანსური რესურსები, რომელიც ეკონომიკაში დასახული მიზნების მისაღწევად უნდა იქნეს გამოყოფილი.