სებ-ში ფინანსური ანგარიშგებისა და გამჭვირვალობის თემაზე ერთკვირიან სამუშაო შეხვედრა გაიმართა. 15-19 ივლისს, ფინანსური ანგარიშგებისა და გამჭვირვალობის თემაზე საქართველოს ეროვნულმა ბანკმა ერთკვირიან სამუშაო შეხვედრას უმასპინძლა. შეხვედრა აზიის განვითარების ბანკის მიერაა დაფინანსებული და ფინანსური მარეგულირებლებისა და ზედამხედველების კვალიფიკაციის ამაღლების ინიციატივის ფარგლებში ტარდება, რომელშიც სხვადასხვა ქვეყნის ცენტრალური ბანკის წარმომადგენლები მონაწილეობენ - ავღანეთიდან, სომხეთიდან, ყაზახეთიდან, ყირგიზეთიდან, პაკისტანიდან, ტაჯიკეთიდან, თურქმენეთიდან, უზბეკეთიდან და საქართველოდან, ასევე ფინანსთა სამინისტროებისა და ფასიანი ქაღალდების მარეგულირებელი სააგენტოებიდან.
შეხვედრაზე, რომელსაც პაკისტანელი და ავსტრალიელი საბანკო ექსპერტები უძღვებოდნენ მარეგულირებლებმა ეფექტური გამჭვირვალობის სისტემები განიხილეს. გაეცნენ ფინანსური ანგარიშგებისა და გამჭვირვალობის უახლეს მიღწევებს. იმსჯელეს ისეთ საკითხებზე როგორიცა, გამჭვირვალობა მცირე და საშუალო საწარმოებისათვის, ასევე, კორპორატიული მართვის მეთოდები გლობალური ფინანსური კრიზისის შემდგომ.
„აზიის განვითარების ბანკი არის ჩვენი გრძელვადიანი პარტნიორი. რეფორმა საბანკო ზედამხედველობაში ხორციელდება აზიის განვითარების ბანკის დაფინანსებით. თვითონ ღონისძიება ძალიან მნიშვნელოვანია ფინანსური მაჩვენებლების, რისკების გამჭირვალობის და მათი გამჟღავნების კუთხით. ძალიან მზარდია დღეისათვის როლი გარეაუდიტორების ბუღალტრული სტანდარტების რეგულირებაში. როგორც მოგეხსენებათ, ბუღალტრული სტანდარტები უფრო წარსულზე ორიენტირებული, ხოლო რეგულირება უფრო მომავალზე ორიენტირებულია. ანუ ჩვენ უფრო ვცდილობთ აქცენტი გავეკეთოთ და შევისწავლოთ ისეთი საკითხების ზეგავლენა ფიანანსურ სექტორზე, რომელიც შეიძლება მომავალში მოხდეს. გლობალური ფინანსური კრიზისის შემდეგ მოხდა ამ ორი მიმართულების მეტად დაახლოება და შესაბამისად თანამშრომლობა, ინფორმაციის გაცვლა და სტანდარტების კიდევ უფრო კარგად ცოდნა, დღეისათვის უფრო მნიშვნელოვანია"- განაცხადა ეროვნული ბანკის ვიცე-პრეზიდენტმა ოთარ ნადარაიამ.
დღესვე ეროვნული ბანკის ვიცე-პრეზიდენტმა ოთარ ნადარაიამ და აზიის განვითარების ბანკის (ADB) მუდმივმა წარმომადგენლმა საქართველოში, ქეითი მერი ჯულიანიმ მონაწილეებს სერთიფიკატები გადასცეს.
