საქართველოში დაიწყო ევროპის რეკონსტრუქციისა და განვითარების ბანკის (EBRD) პრეზიდენტის სერ სუმა ჩაკრაბარტის (Suma Chakrabarti) სამდღიანი ვიზიტი.
ვიზიტის ფარგლებში ევროპის რეკონსტრუქციისა და განვითარების ბანკის პრეზიდენტს სერ სუმა ჩაკრაბარტის შეხვდნენ საქართველოს პრემიერ-მინისტრი ბიძინა ივანიშვილი, ფინანსთა მინისტრი, EBRD-ში საქართველოს მმართველი ნოდარ ხადური, ეკონომიკისა და მდგრადი განვითარების მინისტრი გიორგი კვირიკაშვილი.
განიხილეს საქართველოსა და ევროპის რეკონსტრუქციისა და განვითარების ბანკს შორის მიმდინარე და სამომავლო თანამშრომლობის საკითხები.
„EBRD-ის პრეზიდენტთან შედგა ძალიან საინტერესო შეხვედრა. ვისაუბრეთ საქართველოს ახალი მთავრობის ხედვაზე ეკონომიკის განვითარებასთან დაკავშირებით. სტუმრებს გაცავანი ის ცვლილებები, რომელიც განხორციელდა ქვეყანაში, განსაკუთრებით ეკონომიკურ სექტორში. განვიხილეთ სამომავლო გეგმები. მსურს, კიდევ ერთხელ მადლობა გადავუხადო EBRD-ის პრეზიდენტს იმ ინვესტიციებისთვის, რომელიც ბანკის მხარდაჭერით განხორციელდა ქვეყანაში. ჩვენ მომავალში კიდევ უფრო კარგ პირობებს შევქმნით იმისათვის, რათა ასეთი წარმომადგენლობითი ბანკის ინვესტიციები საქართველოში კიდევ უფრო გაიზარდოს," - განაცხადა საქართველოს პრემიერ-მინისტრმა ბიძინა ივანიშვილმა.
„ძალიან მნიშვნელოვანია EBRD-ის პრეზიდენტის ვიზიტი საქართველოში. ესაა ჩვენი ერთ-ერთი ყველაზე დიდი დონორი და ინვესტორი, ამდენად, მნიშვნელოვანია, ბანკმა გააგრძელოს საქართველოსთან თანამშრომლობა. ამავე დროს, აღსანიშნავია, რომ ქ.სტამბულში გაიმართა EBRD-ის წლიური შეხვედრა, სადაც განხილულ იქნა მნიშვნელოვანი საკითხები და მომავალი წლიური შეხვედრებისთვის ერთ-ერთ კანდიდატად დასახელდება საქართველო. ჩვენ იმედი გვაქვს, რომ უახლოეს 2-3 წელიწადში შევძლებთ EBRD-ის მმართველთა საბჭოს ყოველწლიური შეხვედრის ორგანიზებას," - განაცხადა საქართველოს ფინანსთა მინისტრმა ნოდარ ხადურმა.
„მსურს მადლობა გადავუხადო პრემიერ-მინისტრს ჩვენი დელეგაციის მიღებისთვის. EBRD-ის ძალიან მჭიდრო პარტნიორობა აკავშირებს საქართველოსთან. ბანკი კვლავ გააგრძელებს ინვესტირებას საქართველოში, რაც იქნება იმის დასტური, რომ გვჯერა საქართველოს განვითარების. პრემიერ-მინისტრმა გაგვაცნო ის პრიორიტეტები, რომლის განხორციელებასაც ქვეყნის მთავრობა გეგმავს უახლოეს წლებში. ესაა ფინანსური სექტორის დახმარება, საშუალო და მცირე ბიზნესის, ტურიზმის განვითარების ხელშეწყობა, ინფრასტრუქტურული და ენერგოპროექტების მხარდაჭერა. პრემიერ-მინისტრი მუშაობს, რათა გაუმჯობესდეს საინვესტიციო გარემო და ხელი შეეწყოს ინვესტორებს. ეს მნიშვნელოვანია არა მხოლოდ ჩვენთვის, როგორც უცხოელი ინვესტორისთვის, არამედ ადგილობრივი ინვესტორებისთვისაც. თქვენს ქვეყანას ეკონომიკური განვითარების დიდი პოტენციალი აქვს და შეუძლია მნიშვნელოვანი როლი ითამაშოს მთლიანად რეგიონის განვითარების თვალსაზრისითაც," - განაცხადა სერ სუმა ჩაკრაბარტიმ.
აღსანიშნავია, რომ საქართველოს ფინანსთა მინისტრი ნოდარ ხადური ევროპის რეკონსტრუქციისა და განვითარების ბანკის პრეზიდენტს მიმდინარე წლის მაისში ქ.სტამბულში შეხვდა, სადაც გადაწყდა EBRD-ის პრეზიდენტის ვიზიტი საქართველოში. სერ სუმა ჩაკრაბარტი EBRD-ის მეექვსე პრეზიდენტია და მოვალეობას 2012 წლის ივლისიდან ასრულებს.
საქართველო EBRD-ში 1992 წელს გაწევრიანდა. ბანკი ქვეყნის მნიშვნელოვანი პარტნიორია როგორც ფინანსური თანამშრომლობის კუთხით, ასევე ევროპასთან ურთიერთობის გაღრმავების და ევროპული ინვესტიციების მოზიდვის კონტექსტში.
დღეის მდგომარეობით, EBRD-ს საქართველოში დაფინანსებული აქვს 150-მდე პროექტი დაახლოებით 1.8 მილიარდი ევროს ოდენობით, საიდანაც დაფინანსების 81% მოდის კერძო სექტორზე.
ევროპის რეკონსტრუქციისა და განვითარების ბანკის დაფინანსება მოიცავს საბანკო და ფინანსურ სექტორებს, ენერგეტიკას (განსაკუთრებით განახლებადი ენერგიების კუთხით) ჰიდროენერგეტიკას, საწარმოების მხარდაჭერას აგრობიზნესსა და მრეწველობაში.