31 აგვისტოდან 4 სექტემბრამდე ბათუმი „ბათუმობას" უმასპინძლებს. ღონისძიების დასაგეგმად და დეტალების შესათანხმებლად, აჭარის მთავრობის აპარატში სამუშაო შეხვედრა გაიმართა, რომელსაც აჭარის მთავრობის თავმჯდომარე არჩილ ხაბაძე, მინისტრთა კაბინეტის წევრები, ქალაქის თვითმმართველობის და აჭარის ტურიზმისა და კურორტების დეპარტამენტის წარმომადგენლები ესწრებოდნენ.
როგორც აჭარის მთავრობაში აცხადებენ, სამუშაო შეხვედრაზე სახალხო დღესასწაულის „ბათუმობის" მოწყობის საორგანიზაციო საკითხები განიხილეს. „ბათუმობა" წელს 31 აგვისტოდან 4 სექტემბრამდე გაიმართება და ბათუმის 135 წლის იუბილეს მიეძღვნება. ღონიძიების ფარგლებში მოეწყობა სხვადასხვა კულტურული და სპორტული აქტივობები.