უკრაინას საქართველოსთან დიდი სავაჭრო ომი ელოდება, აღნიშნულის შესახებ ინფორმაციას უკრაინული მედია ავრცელებს.
გაზეთი „კომენტარი" წერს, რომ უკრაინელი მწარმოებლები საბაჟო სირთულეებზე ალაპარაკდნენ, რომელიც საქართველოს მთავრობამ უკრაინიდან საქართველოში შეტანილ პროდუქციას დაუწესა.
„კომენტარი" აღნიშნავს, რომ აღნიშნული პროცესი შესაძლოა უკრაინა-საქართველოს შორის „სავაჭრო ომის" დაწყების წინაპირობა გახდეს.
უკრაინული მედია ადგილობრივ მეწარმეებზე დაყრდნობით იუწყება, რომ ივნისიდან საქართველოში საბაჟო პროცედურების გავლა მათთვის მნიშვნელოვნად გართულდა. - მაგალითად ცნობილი გახდა რამდენიმე შემთხვევის შესახებ, როდესაც ქართულმა მხარემ ქათმით დატვირთული უკრაინული კონტეინერების განბაჟების პროცედურა შეაფერხა.
უკრაინული მედია ასევე იტყობინება იმასაც, რომ ამიერიდან საქართველოში შეტანილ კვერცხზე ინფორმაცია ლაზერით უნდა იყოს დატანილი და განმარტებული კვერცხის გამოშვების თარიღი და მწარმოებელი ქვეყანა. რაც თავის მხრივ პროდუქციაზე ქართული ასოებით უნდა იყოს დატანილი.
გამოცემა ვარაუდობს, რომ აღნიშნული ქმედებები საქართველოს მთავრობის მხრიდან გატარებული იმ მოტივით, რომ ლობირება გაეწიოს ადგილობრივ მწარმოებლებს, რადგანაც ყოფილი სსრკ-ს ქვეყანა პროდუქციის 70 %-ს ქვეყნის ფარგლებს გარედან ყიდულობს. იმავდროულად უკრაინული შაქრის ექსპორტის 30 %-ი საქართველოზე მოდის.
გაზეთი „კომენტარი" არ გამორიცხავს, რომ სამომავლოდ თბილისმა შეზღუდვები კიდევ უფრო გაამკაცროს.
„ფიტოსანიტარული და ვეტერინალური ნორმები შესაძლოა პირველი მერცხალი გახდეს უკრაინა-საქართველოს „სავაჭრო ომში"- წერს გაზეთი.