ტურიზმის ეროვნული ადმინისტრაცია და განათლების სამინისტრო, ახალგაზრდებში მოგზაურობის კულტურის ამაღლებაზე და მათთვის ქვეყნის ტურისტული პოტენციალის გაცნობაზე ერთობლივად იმუშავებენ. მხარეებს შორის ურთიერთთანამშრომლობის მემორანდუმი დღეს გაფორმდა, რომელსაც ხელი განათლებისა და მეცნიერების მინისტრმა გიორგი მარგველაშვილმა და ტურიზმის ეროვნული ადმინისტრაციის ხელმძღვანელმა გიორგი სიგუამ მოაწერეს.
როგორც ტურიზმის ეროვნული ადმინისტრაციის ხელმძღვანელი განმარტავს, თანამშრომლობის მიზანია ქვეყნის შიდა ტურიზმის განვითარების ხელშეწყობის მიზნით, საგანმანათლებლო დაწესებულებების მოსწავლეებისა და სტუდენტებისთვის ქვეყნის ტურისტული პოტენციალის შესახებ ცნობიერების ამაღლება, რაც მომავალი თაობისათვის მოგზაურობისა და ტურიზმის კულტურის დანერგვას ადრეული ასაკიდანვე დაეხმარება.
„ჩვენ მოვახდინეთ დეკლარირება იმისა, რომ საქართველოს ტურიზმის ეროვნული ადმინისტრაცია იმუშავებს არამხოლოდ ტურისტების გარედან შემოყვანაზე, არამედ შიდა ტურიზმის განვითარებასა და ქვეყნის შიგნით დასვენების, მოგზაურობის კულტურის ამაღლებაზე. ამისთვის კი, განათლებისა და მეცნიერების სამინისტრო ჩვენთვის ფასეული პარტნიორი იქნება. მათთან ერთად ჩვენ განვახორციელებთ ღონისძიებებს, რომელიც მოგვეხმარება სტუდენტებსა და მოსწავლეებში ამ თემების პოპულარიზაციაში. ტურიზმის ეროვნული ადმინისტრაცია განათლების სამინისტროსთან ერთად, ერთობლივი ძალებით, მოვაწყობთ სხვადასხვა ბანაკებს, მოგზაურობებს და სხვა. როგორც წესი თბილისელი ბავშვები დადიან რეგიონებში ექსკურსიებზე. ისინი გადიან და ნახულობენ, როგორც წესი დაშტამბულ ადგილებს. რეგიონებში მცხოვრები ბავშვები კი ამ სიამოვნებას მოკლებულნი არიან. ჩვენ ხელს შევუწყობთ იმას, რომ მესტიელმა ბავშვებმა ნახონ მცხეთა, ხოლო ბათუმელმა ბავშვებმა ნახონ ხევსურეთი და სხვა, ანუ გავაკეთოთ როტაციის მაგვარი, რომ ბავშვებს მთელი საქართველო ქონდეთ ნანახი"- აღნიშნა გიორგი სიგუამ.
განათლებისა და მეცნიერების მინისტრის გიორგი მარგველაშვილის განმარტებით კი საქართველო მიმზიდველი ქვეყანაა და მისი ღირსშესანიშნაობები ახალგაზრდებმა აუცილებლად უნდა მოინახულონ.
„მემორანდუმი გულისხმობს ჩვენს ახლო თანამშრომლობას ტურიზმის ადმინისტრაციასთან. საქმე იმაშია, რომ საქართველო მიმზიდველია არა მხოლოდ უცხოელებისთვის არამედ პირველ რიგში ჩვენთვის ქართველებისთვის. ის მრავალფეროვნება, რომელიც საქართველოშია ხშირად არ ვიცით და ამის ცოდნა და ამაში ჩართვა არის ერთ-ერთი ფუნდამენტი, რითაც ჩვენ ვხვდებით უფრო მდიდრები, უფრო ქართველები"- განმარტა მარგველაშვილმა.
