განათლების მინისტრის თანამდებობაზე თამარ სანიკიძე გიორგი მარგველაშვილმა ოფიციალურად, სავარაუდოდ, დღეს უნდა წარადგინოს. "ქართული ოცნების" პრეზიდენტობის კანდიდატი კი პოსტს უახლოეს დღეებში დატოვებს და წინასაარჩევნო კამპანიაში ჩაერთვება.
როგორც მარგველაშვილმა ჟურნალისტებს განუცხადა, ახალი კანდიდატურა პრემიერთან უკვე შეათანხმა. გუშინ გურიაში სტუმრობისას კი მინისტრმა მის შემცვლელად პირველი მოადგილე თამარ სანიკიძე დაასახელა.
შეგახსენებთ, რომ თამარ სანიკიძე 1978 წლის 30 აგვისტოს თბილისში დაიბადა. დაამთავრა ივანე ჯავახიშვილის სახელობის თბილისის სახელმწიფო უნივერსიტეტის დასავლეთ ევროპული ენებისა და ლიტერატურის ფაკულტეტი, 2000 წელს საქართველოს საზოგადოებრივ საქმეთა ინსტიტუტი, 2011-ში კი მართვის ამერიკული ასოციაცია.
განათლების მინისტრის მოადგილეობამდე, 2010-2012 წლებში მუშაობდა საქართველოს საზოგადოებრივ საქმეთა ინსტიტუტში სხვადასხვა თანამდებობაზე. 2003-2005 წლებში იყო "თელასის" ქსელის განვითარების დეპარტამენტის ეკონომისტი, მანამდე კი საქართველოს ტრანსპორტის სამინისტროს საზღვაო დეპარტამენტის წამყვანი სპეციალისტი.