აჭარაში დამატებითი ტურისტების მოსაზიდად აჭარის ტურიზმის დეპარტამენტთან ერთად საქართველოს ტურიზმის ეროვნული ადმინისტრაციაც ინტენსიურად იმუშავებს. როგორც სააგენტო „ჯი-ეიჩ-ენთან" საუბრისას საქართველოს ტურიზმის ეროვნული ადმინისტრაციის ხელმძღვანელმა გიორგი სიგუამ განაცხადა, უახლოეს პერიოდში ადმინისტრაცია დაიწყებს აქტიურ მარკეტინგულ კამპანიას უკრაინის, ლატვიისა და ლიტვის ბაზრებზე.
„აჭარის ტურიზმის დეპარტამენტი აქტიურ მარკეტინგულ კომპანიას აზერბაიჯანსა და უკრაინაში აწარმოებს, თუმცა თავის მხრივ მარკეტინგულ კამპანიას უკრაინაში იწყებს საქართველოს ტურიზმის ეროვნული ადმინისტრაციაც, სადაც ბათუმისა და ზოგადად აჭარის რეკლამებს ჩავდებთ. ანუ აჭარის ტურიზმის დეპარტამენტს მარკეტინგული კამპანიის წარმოებაში და ტურისტების მოზიდვაში ასე ვთქვათ ჩვენც დავეხმარებით. ამის გარდა დაგეგმილი გვაქვს მარკეტინგული კამპანიის წარმოება ლატვიასა და ლიტვაში, სადაც ჩადებული იქნება აჭარის რეკლამაც. უკვე მიმდინარეობს მოლაპარაკება ორი ახალი კლიპის გადაღებაზე, სადაც ბათუმიც აქტიურად იქნება ჩართული"- განაცხადა გიორგი სიგუამ.
აღსანიშნავია, რომ წელს აჭარაში 2 მლნ-მდე ტურისტს ელოდებიან.
