2013 წლის პირველი ნახევრის მონაცემებით, აჭარაში სასტუმროთა დატვირთულობის კოეფიციენტი 15 %-ითაა გაზრდილი, აღნიშნულის შესახებ განცხადება საქართველოს ტურიზმის ეროვნული ადმინისტრაციის ხელმძღვანელმა გიორგი სიგუამ გააკეთა. სიგუას განმარტებით, აჭარაში საზღვაო სეზონი ახალი დაწყებულია და შესაბამისად სასტუმროთა დატვირთულობა სამომავლოდ კიდევ უფრო გაიზრდება.
„იანვარ-ივნისის მონაცემებით აჭარაში სასტუმროების დატვირთულობის კოეფიციენტი, გასული წლის ანალოგიურ პერიოდთან შეადრებით 15 %-ით გაიზარდა. თუმცა სეზონის განმავლობაში ზრდა კიდევ უფრო მაღალი იქნება, რადგანაც სეზონი ჯერ კიდევ წინ არის"- აცხადებს სიგუა.
ტურიზმის ეროვნული ადმინისტრაციის ხელმძღვანელი აჭარაში ჩასულ ტურისტებს სასიამოვნო დასვენებასთან ერთად, საინტერესო კულტურულ თუ გასართობ ღონისძიებებს პირდება.
„რაც შეეხება აჭარაში დაგეგმილ სიახლეებს ივლისში თითქმის ყოველი დღე დატვირთული იქნება. თუმცა მთავარი მოვლენებიდან ერთ-ერთი ბათუმის ჯაზ ფესტივალი იქნება, რომელიც 18-21 ივლისს გაიმართება. გარდა ამისა ბათუმში ჩამოვა მოსკოვის ცირკი, რომელიც საკმაოდ საინტერესო წარმოდგენებს გამართავს. 20 ივლისს დაგეგმილია ანდრეი მაკარევიჩის კონცერტი ბათუმში. აგვისტოში დაგეგმილია ასევე მოტოციკლეტებისა და ბაიკერების ფესტივალი. აგვისტოში აღინიშნება ახალგაზრდობის დღე და ასევე მსოფლიო ქველმოქმედების დღე. მოეწყობა ასევე ავტომობილების გამოფენა, ივლისში დაგეგმილია მსოფლიო მოსახლეობის დღის აღნიშვნა. 24 ივლისს ბათუმის პიაცაზე ზემფირას კონცერტი გაიმართება"- განაცხადა „ჯი-ეიჩ-ენთან" საუბრისას გიორგი სიგუამ.
შეგახსენებთ, რომ ბათუმის ჯაზ ფესტივალზე წელს გრემის შვიდგზის მფლობელი ამერიკელი ჯაზმენი ელ ჯერო იმღერებს. Black Sea Jazz Festival-ის ორგანიზატორი კომპანია „ისტერნ პრომოუშენის" ინფორმაციით ელ ჯერო 18 ივლისს გახსნის ბათუმის ჯაზ ფესტივალს. ელ ჯეროს გარდა მაიკ სტერნი, 19 ივლისს, 21 ივლისს კი ხოსე ჯეიმსი იდგება სცენაზე. ფესტივალის ფარგლებში ჯაზის მოყვარულებისთვის არაერთი საინტერესო კონცერტი და გასართობი საღამო იგეგმება.
18-21 ივლისამდე მსმენელს ცნობილი მომღერლების საღამოები ელოდებათ, როგორებიცაა : Barry White ,Stevie wonder და James brown.
ძირითადი ღონისძიებები შარშანდელის მსგავსად ბათუმის ტენისის კორტზე გაიმართება.
Black sea Jazz Festival-ზე დასასწრები კონცერტების ბილეთების ფასი 50-დან 100 ლარამდეა.
