„ტურისტების რიცხვი ბოლო ხუთი წლის განმავლობაში იმდენად გაიზარდა, რომ დეფიციტი შეიქმნა როგორც განთავსების საშუალების, ისე კვების ობიექტის. აღსანიშნავია, რომ ერთ-ერთმა ოჯახმა მიმდინარე სეზონზე 400 სტუმარი, თხუთმეტი 20 კაციანი ჯგუფი მიიღო, ძირითადად ისრაელიდან. საოჯახო სასტუმროების მფლობელების ინფორმაციით სტუმრების 60-70% უცხოელია. ადგილობრივი ტურისტები კი ღამის გასათევად ძირითადად კარვებს იყენებენ"- აღნიშნა სიგუამ.

მისივე თქმით, შატილში ტურიზმის განვითარების ერთ-ერთი უმთავრესი კომპონენტია ტურისტული ინფრასტრუქტურის განვითარება.
„ამ მიმართულებით USAID-ის ეგიდით განხორციელდა რამდენიმე პროექტი, მათ შორის: „ეკოლოგიური ტურიზმის განვითარება განახლებადი ენერგიის წყაროების გამოყენებით" და „ენერგოეფექტური საპილოტე პროექტის განხორციელება ახალი თაობის თბური ტუმბოს გამოყენებით" პირველად საქართველოში. ასევე ამუშავდა მცირე ჰესი, რომელიც დაეხმარება შატილის ელექტროენერგიით უზრუნველყოფას"- აცხადებს ტურიზმის ეროვნული ადმინისტრაციის ხელმძღვანელი.

შატილის სკოლა-ინტერნატის შენობას ზაფხულის განმავლობაში შესაძლებლობა მიეცემა გახდეს დამატებითი სერვისის მიმწოდებელი ვინაიდან სწავლა ზაფხულში შეწყვეტილია. ასევე დონორი ორგანიზაციის მხრიდან დაფინანსდა ტრენინგი საოჯახო სასტუმროს მეპატრონეთათვის _ მომსახურების ხარისხის გაუმჯობესების მიზნით.

აღსანიშნავია, რომ ხევსურეთის ტურიზმის ასოციაციის ორგანიზებით შეიქმნა სამუშაო ჯგუფი, რომელიც იმუშავებს შატილის ტურიზმის მარკეტინგული განვითარების გეგმის შექმნაზე.