ეკონომიკური ზრდის შენელება და გაუარესებული ეკონომიკური მაჩვენებელები ბუნებრივია,ასახვას ჰპოვებს სახელმწიფო ბიუჯეტის
შემოსავლებზეც, განსაკუთრებით - საგადასახადო შემოსავლებზე. ეკონომიკური პოლიტიკის კვლევის ცენტრის საჯარო პოლიტიკის მიმოხილვის მორიგ დოკუმენტში „ფისკალური პოლიტიკის როლი ეკონომიკურ ზრდაში (სახელმწიფო ბიუჯეტის 6 თვის შესრულების მაჩვენებლები)", აღნიშნულია, რომ 2013 წლის 6 თვის მდგომარეობით,სახელმწიფო ბიუჯეტში საგადასახადო შემოსავლების სახით, მობილიზებული იქნა 2 981,5 მლნ ლარი, რაც წლიური გეგმიური მაჩვენებლის 43%-ს შეადგენს. წინა წელთან შედარებით, აღნიშნული მაჩვენებელი შემცირებულია. კერძოდ, 2012 წლის 6 თვის განმავლობაში ბიუჯეტში გადასახადებიდან მობილიზებული იქნა 2 963,1 მლნ ლარი, რაც წლიური მაჩვენებლის 47%-ს შეადგენდა. 2013 წლის სახელმწიფო ბიუჯეტით გადასახადებიდან მისაღები შემოსავლები განისაზღვრა 6 920,0 მლნ ლარით, რაც 9,6%-ით აღემატება 2012 წლის ფაქტიურ მაჩვენებელს.
„ფაქტიური შესრულების მაჩვენებელები მნიშვნელოვნად ჩამორჩება 2013 წლის ბიუჯეტით დაგეგმილი მაჩვენებლის შესრულებისათვის საჭირო მოცულობებს. შესაბამისად, უნდა ვივარაუდოთ, რომ 2013 წლის 6 თვის მონაცემებით, სახელმწიფო ბიუჯეტს გადასახადების მუხლში, 265 მლნ ლარზე მეტი დააკლდა და აღნიშნული ტენდენციის გაგრძელების პირობებში, წლის დარჩენილ პერიოდში, სახელმწიფო ბიუჯეტისათვის დაკლებული თანხა კიდევ უფრო გაიზრდება"- ნათქვამია ანგარიშში.
